ఆత్మ శరీరాన్ని విడిచిపెట్టలేదన్న కారణంతో.. గెషే ఫుంట్సోక్ (90) అనే బౌద్ధ సన్యాసి మృతదేహానికి గత కొన్ని రోజులుగా అంత్యక్రియలు నిర్వహించని అనుచరులు, ఎట్టకేలకు గురువారం దహనసంస్కారాలు జరిపారు. గెషే మరణించిన 14 రోజుల తర్వాత ఆయన శరీరానికి దహన సంస్కారాలు చేయడం గమనార్హం. ఈ ఘటన కర్ణాటకలోని జరిగింది.
ఉత్తర కన్నడ జిల్లా ముందగొడు తాలూకాలోని టిబెటన్ కాలనీలో నివాసముంటున్న గెషే సన్యాసి.. ఈ నెల 9న పరమపదించారు. అనంతరం ఆయన పార్థివదేహాన్ని భద్రపరిచిన భిక్కులు.. రోజూ ప్రార్థనలు చేసేవారు. ఆయన ఆత్మ.. దేహాన్ని విడిచిపెట్టిందా? లేదా? అన్న విషయాన్ని తెలుసుకునేందుకు.. సన్యాసుల్లో ఒకరు ఎప్పటికప్పుడు ఆ గదిలోకి వెళ్లి చూసి వచ్చేవారు. నోరు, ముక్కులో నుంచి ద్రవం బయటకు వచ్చినా, వాసన వచ్చినా ఆత్మ శరీరాన్ని విడిచిపెట్టినట్టు వారు విశ్వసిస్తారు.
ఇప్పుడు ఆ ఆత్మ, గెషే శరీరాన్ని విడిచిపెట్టిందని భావించిన భిక్కులు.. ఆయన శరీరానికి అంత్యక్రియలు నిర్వహించారు.
టిబెటన్ కాలనీలో గతంలోనూ ఇలాంటి ఘటనలు జరిగాయి. నలుగురు సన్యాసులు.. దేహాన్ని విడిచిపెట్టగా.. ఆ తర్వాత వారికి పూజలు చేశారు. 7-15 రోజుల మధ్య వారి అంత్యక్రియలు జరిగాయి.
ఇదీ చూడండి : నదిలో కొట్టుకుపోయిన ఏనుగులు- కాపాడేందుకు అధికారుల యత్నం
