కర్ణాటకలో సీఎం పదవిని వదులుకున్న బీఎస్ యడియూరప్ప.. తర్వాతి అడుగు ఎటువైపు వేస్తారనే విషయంపై ఆసక్తి నెలకొంది. రాష్ట్ర రాజకీయాల్లో గత కొద్దిరోజులుగా జరుగుతున్న తీవ్ర చర్చకు ఫుల్స్టాప్ పెడుతూ సోమవారమే తన రాజీనామా నిర్ణయాన్ని ప్రకటించారు యడ్డీ. గవర్నర్ను కలిసి.. రాజీనామా లేఖను సైతం సమర్పించారు. ఈ నేపథ్యంలో ఆయనకు భాజపా అధిష్ఠానం ఏ పదవిని కట్టబెడుతుందనే విషయం చర్చనీయాశంగా మారింది.
గవర్నర్ పదవికి నో!
ముఖ్యమంత్రి పదవిని వదులుకున్న యడ్డీని.. ఏదైనా రాష్ట్రానికి గవర్నర్గా పంపాలని భాజపా అధిష్ఠానం నిర్ణయం తీసుకున్నట్లు తెలుస్తోంది. అయితే ఈ ప్రతిపాదనను యడియూరప్ప నిర్ద్వంద్వంగా తోసిపుచ్చినట్లు సమాచారం. ఎట్టి పరిస్థితుల్లోనూ క్రియాశీల రాజకీయాల్లోనే ఉండాలని ఆయన నిర్ణయం తీసుకున్నారని సన్నిహత వర్గాలు చెబుతున్నాయి.
'కేంద్రానికి వెళ్లను'
కేంద్రంలో ఎలాంటి పదవి చేపట్టే అవకాశం లేదని యడ్డీ తేల్చి చెప్పారు. 'వాజ్పేయీ ప్రధానిగా ఉన్నప్పుడు కేంద్ర మంత్రి పదవిని తిరస్కరించా. భవిష్యత్లో కేంద్రంలో ఎలాంటి పదవి చేపట్టను' అని సోమవారం తన ప్రసంగంలో స్పష్టం చేశారు. ఈ నేపథ్యంలో.. భాజపాకు గుడ్బై చెప్పి కొత్తగా పార్టీ ఏర్పాటు చేస్తారా అన్న వార్తలు రాష్ట్ర రాజకీయాల్లో తెరపైకి వస్తున్నాయి. లింగాయత్ వర్గాల్లో పట్టున్న యడ్డీ.. 2012లో మాదిరిగానే వేరు కుంపటి పెడతారని ఊహాగానాలు చక్కర్లు కొడుతున్నాయి.
కొడుకుల కోసమే
యడ్డీ భాజపా నుంచి వేరువడితే.. తన ఇద్దరు కుమారుల పరిస్థితి ఏంటన్నది ఆసక్తికరంగా మారుతుంది. నిజానికి ఈ కారణంతోనే గవర్నర్ పదవిని యడియూరప్ప తిరస్కరించారని సమాచారం. గవర్నర్గా ఎంపికైతే తన కొడుకుల్లో ఒకరు కర్ణాటకను వదిలి తన వెంటే ఉండాల్సి వస్తుందని, అది వారి రాజకీయ భవిష్యత్ను నాశనం చేస్తుందని యడ్డీ భావిస్తున్నారని సంబంధిత వర్గాలు చెబుతున్నాయి. గవర్నర్గా ఓ రాజ్భవన్కు పరిమితం కాకుండా.. కర్ణాటక ప్రజల మధ్యే ఉండాలని యడియూరప్ప కోరుకుంటున్నారని తెలుస్తోంది.
ఇదీ చదవండి:
యడియూరప్పకు ఆ రెండేళ్లు సవాళ్ల సవారీనే!
