వీధి వ్యాపారుల వద్ద కూరగాయలు, లేదా పండ్లు కొనుగోలు చేస్తాం. కానీ వాటిని తీసుకువెళ్లి ఒక్కరోజు ఉంచామో లేదో మరుసటి రోజు కల్లా పాడైపోతుంటాయి. ఈ సమస్యకు పరిష్కారం చూపించేందుకు కర్ణాటకలోని ఇండియన్ ఇన్స్టిట్యూట్ ఆఫ్ హార్టికల్చర్(ఐఐహెచ్ఆర్) పరిశోధకులు ఓ సరికొత్త ఆవిష్కరణ చేశారు. సౌర శక్తితో పనిచేసే ఓ ట్రై సైకిల్ను అభివృద్ధి చేశారు. ఇది అమ్మేవారికి, కొనేవారికి.. ఇద్దరికి ఉపయోగపడుతుందని వారు చెబుతున్నారు. ఆ ట్రై సైకిల్కు 'ఆర్కా' అని నామకరణం చేశారు.
లాభాలేంటి?
దుమ్ము, ధూళి నుంచి కూరగాయలను కాపాడేందుకు ఈ బండి చుట్టూ ఓ గ్లాస్ ఏర్పాటు చేసి ఉంటుంది. ఇందులోని శీతలీకరణ వాతావరణం వల్ల 48 గంటల పాటు కూరగాయలు, పండ్లు తాజాగా ఉంటాయి. పంటకోత అనంతరం వాటిని బయటపెట్టడం వల్ల పాడైపోయి నష్టాలు ఎదురవుతుంటాయి. ఈ ట్రై సైకిల్ సాయంతో ఆ నష్టాలను అరికట్టవచ్చు.
ఆర్కా ప్రత్యేకతలివే..
- ఈ త్రిచక్ర వాహనంలో 20 క్రేట్లు ఉంటాయి. వీటి సాయంతో 250 కిలోల నుంచి 300 కిలోల వరకు కూరగాయలను భద్రపరుచుకోవచ్చు.
- రాత్రిపూట అమ్మేందుకు వీలుగా ఎల్ఈడీ దీపాలు ఉంటాయి.
- డిజిటల్ తూకం ఉంటుంది.
- కూరగాయల గురించి ప్రచారం చేసేందుకు ఓ మైక్ సిస్టమ్ కూడా ఉంటుంది.
- వర్షం కురిసే వేళలో సౌరశక్తి అందకపోతే.. విద్యుత్ ఛార్జింగ్ సదుపాయమూ ఉంటుంది.
- ఈ త్రిచక్ర వాహనాన్ని ఒక్కసారి ఛార్జ్ చేస్తే 20 కిలోమీటర్ల దూరం ప్రయాణించవచ్చు.
- దీని ధర దాదాపు రూ.1.5 లక్షలుగా ఉంది.
ట్రయల్ రన్లో భాగంగా.. షెడ్యూల్డ్ సామాజిక వర్గానికి చెందిన ఐదుగురు లబ్ధిదారులకు ఉచితంగా వీటిని అందించింది ఐఐహెచ్ఆర్.
ఇదీ చదవండి:కుడి కాలికి గాయం... ఎడమ కాలికి వైద్యం!
