Schools reopening: కొవిడ్-19 మార్గదర్శకాలు పాటిస్తూ భౌతిక తరగతులు నిర్వహించేలా.. దశలవారీగా పాఠశాలలను ప్రారంభించేందుకు సిద్ధమవుతోంది కేంద్ర ప్రభుత్వం. పాఠశాలల పునఃప్రారంభానికి ఓ నమూనాను తయారు చేస్తున్నట్లు అధికారవర్గాలు తెలిపాయి.
ఒమిక్రాన్ వేరియంట్ వేగంగా వ్యాప్తి చెందుతున్న క్రమంలో దేశంలోని దాదాపు అన్ని ప్రాంతాల్లో భౌతిక తరగతులు మూతపడ్డాయి. విద్యార్థులు ఆన్లైన్ క్లాసులకే హాజరవుతున్నారు. దేశంలో దాదాపు రెండేళ్లుగా ఇదే పరిస్థితి కొనసాగుతోంది.
" పాఠశాలలు తెరవాలని విద్యార్థుల తల్లిదండ్రులు డిమాండ్ చేస్తున్న క్రమంలో.. కొవిడ్ మార్గదర్శకాలు పాటిస్తూ భౌతిక తరగతులు నిర్వహించేలా.. దఫాలవారీగా పాఠశాలలు తెరిచేందుకు కేంద్ర ప్రభుత్వం ఓ నమూనాను సిద్ధం చేస్తోంది."
- ప్రభుత్వ ఉన్నతాధికారి.
విద్యార్థుల తల్లిదండ్రుల తరఫున ప్రముఖ అంటువ్యాధుల నిపుణులు చంద్రకాంత్ లహారియా, పాలసీ రీసెర్చ్ కేంద్రం అధ్యక్షురాలు యామిని అయ్యర్.. బుధవారం దిల్లీ ఉపముఖ్యమంత్రి మనీశ్ సిసోడియాను కలిశారు. 1,600 మంది తల్లిదండ్రులు సంతకాలు చేసిన మెమోరండం అందించారు. పాఠశాలలు తెరవాలని డిమాండ్ చేశారు. ఇతర రాష్ట్రాల్లోనూ ఇలాంటి డిమాండ్లే వస్తున్నాయి. అయితే.. మరికొంత మంది ఆన్లైన్ తరగతులను కొనసాగించాలని కోరుతున్నారు.
దేశ రాజధానిలో పాఠశాలలను తెరవాలని దిల్లీ ప్రభుత్వం సూచించింది. అయితే, ఈ అంశంపై చర్చించేందుకు దిల్లీ విపత్తు నిర్వాహణ సంస్థ గురువారం సమావేశం కానుంది. ఆ తర్వాతే పాఠశాలల పునఃప్రారంభంపై నిర్ణయం వెలువడనుంది. ఈ సందర్భంగా.. పిలల్ల సామాజిక, మానసిక పరిస్థితిపై ప్రభావాన్ని తగ్గించాల్సిన అవసరం ఉందన్నారు దిల్లీ ఉప ముఖ్యమంత్రి మనీశ్ సిసోడియా. భౌతిక తరగతును ఆన్లైన్ తరగతులు ఎప్పటికీ భర్తీ చేయలేవని నొక్కిచెప్పారు.
సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!
ఇదీ చూడండి: దిల్లీలో ఆంక్షల సడలింపు.. వారాంతపు కర్ఫ్యూ ఎత్తివేత
