చమురు ధరలు పెరుగుతున్న నేపథ్యంలో.. కేంద్రంలోని భాజపా ప్రభుత్వంపై కాంగ్రెస్ అగ్రనేత రాహుల్ గాంధీ తీవ్ర విమర్శలు చేశారు. ప్రజల జేబుల నుంచి డబ్బు లాక్కుని ప్రభుత్వాన్ని నడిపిస్తున్నారని ఆరోపించారు.
కేరళ ఎన్నికల ప్రచారంలో భాగంగా.. కొచ్చిలోని సెయింట్ థెరెస్సా మహిళా కళాశాల విద్యార్థులతో రాహుల్ మచ్చటించారు. ఆర్థిక వ్యవస్థ పతనమవ్వడానికి ప్రభుత్వం అనుసరిస్తున్న విధానాలే కారణమని దుయ్యబట్టారు.
"సంక్షోభం నుంచి బయటపడేందుకు ప్రజల చేతికి డబ్బులు ఇవ్వడం ఒకటే మార్గం. కానీ, ప్రభుత్వం మాత్రం ఆ పని చేయకుండా ఉత్పత్తి పెంచండి అని చెబుతోంది. జీఎస్టీ వల్ల ఆర్థిక వ్యవస్థ తీవ్రంగా దెబ్బతింది. కరోనా మహమ్మారి వల్ల అది పూర్తిగా నాశనమైంది. ప్రస్తుతం ప్రభుత్వం వద్ద డబ్బు లేదు. సంపదను సృష్టించలేకపోతోంది. అందుకే.. పెట్రోల్, డీజిల్ పేరుతో ప్రజల వద్ద నుంచి డబ్బు లాక్కుంటోంది."
-రాహుల్ గాంధీ, కాంగ్రెస్ అగ్రనేత
ఆర్థిక వ్యవస్థ వృద్ధి పథంలో నడవాలంటే.. ప్రశాంత వాతావరణం కీలక పాత్ర పోషిస్తుందని రాహుల్ అన్నారు.
