కంప్ట్రోలర్ అండ్ ఆడిటర్ జనరల్(కాగ్)పై కాంగ్రెస్ నేత రాహుల్ గాంధీ విమర్శలు చేశారు. గత కొన్నేళ్లగా కాగ్ నివేదికలు అందించడంలో జాప్యం జరుగుతోందని రాహుల్ ఆరోపించారు. 'కాగ్'.. పంజరంలో బందీ(కేజ్డ్)గా మారిపోయిందని అన్నారు.
కాగ్ నివేదికల్లో జాప్యానికి సంబంధించిన వివరాలను ట్విట్టర్లో పంచుకున్నారు రాహుల్. 2011-12 ఆర్థిక సంవత్సరం మొదలుకొని ఇప్పటివరకు కాగ్ నివేదికలను రూపొందించేందుకు తీసుకున్న సమయాన్ని అందులో పేర్కొన్నారు.
2017-18, 2018-19 ఆర్థిక సంవత్సరాలకు సంబంధించి నివేదికలు అందించేందుకు కాగ్ ఆ ఆర్థిక ఏడాది పూర్తయిన తర్వాత 12-18 నెలల నుంచి 18-24 నెలల సమయం తీసుకుందని రాహుల్ పేర్కొన్నారు. మరికొన్ని ఇప్పటికీ పెండింగ్లో ఉన్నాయని అన్నారు. అయితే ట్విట్టర్లో షేర్ చేసిన వివరాలకు సంబంధించి రాహుల్ ఎలాంటి ఆధారాలు చెప్పలేదు.
కాగా, గత ఐదేళ్లలో కాగ్ అందించే నివేదికల సంఖ్య గణనీయంగా తగ్గిందని ఓ మీడియా సంస్థ తన నివేదికలో పేర్కొంది. కేంద్ర విభాగాలపై కాగ్ రూపొందించిన నివేదికలు 2015లో 55 ఉండగా, 2020లో ఆ సంఖ్య కేవలం 14కే పరిమితమైందని తెలిపింది. సుమారు 75 శాతం మేర నివేదికలు తగ్గిపోయాయని వెల్లడించింది.
ఇదీ చదవండి : మహాకూటమి నందిగ్రామ్ అభ్యర్థిగా మీనాక్షీ ముఖర్జీ
