Quad meet: ఉక్రెయిన్ సంక్షోభాన్ని చర్చలు, దౌత్యమార్గం ద్వారా పరిష్కరించుకోవాలని ప్రధాని నరేంద్ర మోదీ పిలుపునిచ్చారు. క్వాడ్ దేశాల సమావేశంలో ప్రధాని వర్చువల్‌గా పాల్గొన్నారు. ఈ సమావేశానికి అమెరికా అధ్యక్షుడు జో బైడెన్ సహా ఆస్ట్రేలియా ప్రధాని స్కాట్‌ మోరీసన్‌, జపాన్‌ ప్రధాని ఫుమియో కిషిదా హాజరయ్యారు. ఉక్రెయిన్ అభివృద్ధి అక్కడ మానవ సంక్షోభంపై క్వాడ్ నేతలు చర్చించారు. ఐక్యరాజ్య సమితి చార్టర్‌, అంతర్జాతీయ చట్టాల ప్రకారం ఒక దేశ ప్రాదేశిక సమగ్రతను, సార్వభౌమాధికారానికి కట్టుబడి ఉండాలని మోదీ పునరుద్ఘాటించారు.
ఇండో-పసిఫిక్ ప్రాంతంలో శాంతిని, స్థిరత్వాన్ని ప్రోత్సహించడమే ప్రధాన లక్ష్యంగా క్వాడ్ దృష్టి సారించాలని మోదీ నొక్కిచెప్పారు. మానవత, విపత్తు సహాయం, రుణ స్థిరత్వం, సప్లై, క్లీన్‌ ఎనర్జీ, కనెక్టివిటీ, అనుసంధానం,సామర్థ్యాలు పెంచుకోవడంలో క్వాడ్ దేశాల మధ్య బలమైన, ఆచరణాత్మక సహకారం ఉండాలని పిలుపునిచ్చారు. గత సెప్టెంబర్‌లో జరిగిన సమ్మిట్ నివేదిక, క్వాడ్ కార్యక్రమాల పురోగతిని సమావేశంలో సమీక్షించారు.
ఈ ఏడాది చివరిలో జపాన్‌లో జరిగే శిఖరాగ్ర సదస్సు ద్వారా క్వాడ్ దేశాల మధ్య సహకారాలు మరింత వేగవంతం కావాలని నేతలు అంగీకరించారు. ఆగ్నేయాసియా, హిందూ మహాసముద్రం, పసిఫిక్ దీవులలోని పరిస్థితులను కూడా నేతలు సమావేశంలో చర్చించారు.
క్వాడ్కు బీటలపై ఊహాగానాలకు తెర
ఉక్రెయిన్ సంక్షోభంతో భారత్, అమెరికా మధ్య విభేదాలు తలెత్తాయని.. ఇకపై క్వాడ్ ఐక్యంగా ఉండబోదని ఇన్నాళ్లూ వచ్చిన ఊహాగానాలను ఈ కూటమి దేశాధినేతల తాజా సమావేశంతో తెరపడినట్లయింది. ఇండో-పసిఫిక్ ప్రాంతంలో భవిష్యత్తులో తలెత్తే పెను సవాళ్లు ఎదుర్కొనేందుకుగాను మానవీయ సహాయం అందించడంతో పాటు విపత్తుల వేళ తోడ్పాటునందించేందుకు ప్రత్యేక వ్యవస్థను ఏర్పాటుకు చేయాలని మోదీ, బైడెన్, మోరిసన్, కిషిదా అంగీకరించారు.
ప్రాథమికంగా ఇండో-పసిఫిక్ ప్రాంతంలో శాంతి, సుస్థిరతల కోసం ఏర్పాటైన ఈ కూటమి.. తాజాగా ఐరోపాలో నెలకొన్న పరిస్థితులపై(రష్యా-ఉక్రెయిన్ యుద్ధం) చర్చించడం కూడా ప్రాధాన్యం సంతరించుకుంది.
ఇదీ చూడండి: 'వైద్య విద్య కోసం విదేశాలకు వెళ్లాల్సి రావడం.. గత పాలకుల వల్లే'
