పంజాబ్లో విషాదం జరిగింది. అప్పుల బాధ భరించలేక ఓ రైతు, అతని కుమారుడు ఆత్మహత్యకు పాల్పడ్డారు. హోషియార్పుర్ జిల్లా ముహాదిపుర్లో జగ్తార్ సింగ్(70), అతని కుమారుడు కృపాల్ సింగ్(42) శనివారం ఉదయం మృతిచెందినట్లు డీఎస్పీ మునీష్ కుమార్ తెలిపారు. విషాహారం తీసుకుని వారు ఆత్మహత్యకు పాల్పడ్డారని చెప్పారు. వారి ఇంట్లో ఓ సూసైడ్నోట్ను పోలీసులు స్వాధీనం చేసుకున్నారు.
వ్యవసాయ రుణాలను మాఫీ చేయడంలో రాష్ట్ర ప్రభుత్వం విఫలమైనందున, కేంద్రం సాగు చట్టాలను రద్దు చేయని నేపథ్యంలోనే తాము బలవన్మరణానికి పాల్పడుతున్నట్లు వారు ఆ లేఖలో పేర్కొన్నారు. మృతి చెందిన తండ్రీ కుమారుడికి తలో ఎకరం పొలం ఉందని పోలీసులు చెప్పారు. మృతదేహాలను పోస్టుమార్టం కోసం ఆసుపత్రికి తరలించామని తెలిపారు.
రాజకీయ రగడ..
అన్నదాతల ఆత్మహత్య నేపథ్యంలో ప్రతిపక్ష శిరోమణి అకాళీ దళ్(ఎస్ఏడీ), ఆమ్ ఆద్మీ పార్టీలు.. ఆ రాష్ట్ర ముఖ్యమంత్రి అమరీందర్ సింగ్ రాజీనామా చేయాలని డిమాండ్ చేశాయి.
కాంగ్రెస్ ప్రభుత్వ అబద్ధాలు, మోసాలు.. అన్నదాతల ఆత్మహత్యలతో బయటపడ్డాయని ఎస్ఏడీ నేత, మాజీ మంత్రి విక్రమ్ సింగ్ మజితీయా ఆరోపించారు. నూతన వ్యవసాయ చట్టాలను కేంద్రం రద్దు చేయాలని డిమాండ్ చేశారు. ఆప్ నేతలు కుల్తార్ సింగ్ సంద్వాన్, గుర్మీత్సింగ్.. బాధిత కుటుంబ సభ్యులను పరామర్శించి సానుభూతి తెలిపారు.
ఇదీ చదవండి:మోదీ.. పాత కథల్లోని అహంకార రాజు: ప్రియాంక
