పంజాబ్ కాంగ్రెస్లో(Punjab congress) రాజకీయ గిల్లికజ్జాలు కొనసాగుతున్న వేళ.. ఆ రాష్ట్ర ముఖ్యమంత్రి కెప్టెన్ అమరిందర్ సింగ్ (Amarinder singh) పార్టీ హైకమాండ్తో సమావేశానికి సిద్ధమయ్యారు. కాంగ్రెస్ అగ్రనేతలతో ఈ భేటీ జరగనున్నట్లు తెలుస్తోంది. పార్టీలో అసమ్మతి గళం వినిపిస్తున్న నవ్జోత్ సింగ్ సిద్ధూ వివాదాన్ని పరిష్కరించేందుకు ఈ సమావేశంలో చర్చలు జరగనున్నట్లు అమరిందర్ సన్నిహితులు తెలిపారు. అయితే, సమావేశం తేదీ ఇంకా ఖరారు కాలేదని చెప్పారు.
గతవారమే నవ్జోత్ సింగ్ సిద్ధూ(navjot singh sidhu).. కాంగ్రెస్ ప్రధాన కార్యదర్శి ప్రియాంకా గాంధీ, పార్టీ మాజీ అధ్యక్షుడు రాహుల్ గాంధీని కలిశారు. పార్టీలో పరిస్థితులపై సిద్ధూ తన అభిప్రాయాలను కాంగ్రెస్ నాయకత్వానికి వివరించారు. ఆ సమయంలో అమరిందర్ దిల్లీలోనే ఉన్నప్పటికీ.. అధిష్ఠానాన్ని కలిసేందుకు అవకాశం రాలేదని అప్పట్లో వార్తలొచ్చాయి. ఈ నేపథ్యంలో.. త్వరలో జరిగే భేటీలో అమరీందర్ తన వాదనను పార్టీ నాయకత్వం ముందుంచే అవకాశం ఉంది.
ఇదీ చదవండి: సీఎంతో భేటీకి నో- సిద్ధూతో మాత్రం సుదీర్ఘ చర్చలు!
పీసీసీ చీఫ్గా హిందూ నేత!
ప్రస్తుతం పంజాబ్ పీసీసీ చీఫ్గా ఉన్న సునీల్ జాఖర్పై వేటు తప్పదని విశ్వసనీయ వర్గాలు చెబుతున్నాయి. ఆయన స్థానంలో ఓ హిందూ నేతను నియమించేలా అధిష్ఠానానికి సూచన ఇస్తున్నారు అమరిందర్ సింగ్. సిద్ధూకు చెక్ పెట్టేందుకే హిందూ నేతను పీసీసీ చీఫ్గా నియమించాలనే ప్రతిపాదన తీసుకొచ్చారని సమాచారం. ఈ మేరకు సిద్ధూ.. ప్రియాంకా గాంధీని కలిసిన తర్వాతి రోజే.. పార్టీలోని హిందూ నేతలతో అమరిందర్ సమావేశమయ్యారు. మంత్రి పదవిలో ఉన్న ఓ నేతతో పాటు కేంద్ర మాజీ మంత్రి, ఓ ఎంపీ పీసీసీ చీఫ్ రేసులో ఉన్నట్లు తెలుస్తోంది.
"సిద్ధూకు పెద్ద బాధ్యతే అప్పగిస్తారు. పార్టీ అధిష్ఠానంతో అమరీందర్ సింగ్ భేటీ అయిన తర్వాత అన్నింటిపై స్పష్టత వస్తుంది. ఉప ముఖ్యమంత్రితో పాటు ప్రచార కమిటీ ఛైర్మన్ పదవులను ఇచ్చేలా అమరిందర్ చర్చించనున్నారు. అమరిందర్ సింగ్ అభిప్రాయాన్ని పరిగణలోకి తీసుకున్న తర్వాతే కాంగ్రెస్ నాయకత్వం తుది నిర్ణయం తీసుకుంటుంది."
-పార్టీ వర్గాలు
మరోవైపు, సీనియర్ నేతలు అమరిందర్ తీరు పట్ల అసంతృప్తి వ్యక్తం చేస్తున్నారు. పంజాబ్ కాంగ్రెస్లో సంక్షోభం అమరిందర్ సింగ్ వర్సెస్ సిద్ధూ కాదని చెబుతున్నారు. సీఎం పనితీరు పట్ల అనేక మంది ఎమ్మెల్యేలు అసంతృప్తితో ఉన్నారని, ఇదే విషయాన్ని అధిష్ఠానం దృష్టికి తీసుకెళ్తున్నామని చెప్పారు.
వచ్చే ఏడాది అసెంబ్లీ ఎన్నికలు జరగనున్న నేపథ్యంలో రాష్ట్ర కాంగ్రెస్లో సంక్షోభ పరిస్థితులు.. పార్టీ ఫలితాలపై ప్రభావం చూపే ప్రమాదం ఉంది. దీన్ని పరిష్కరించే దిశగా పార్టీ అధిష్ఠానం ఇదివరకే ముగ్గురు సభ్యుల ప్యానెల్ను ఏర్పాటు చేసింది. దీనిపై పార్టీ అధినేత్రి సోనియా గాంధీకి ఈ ప్యానెల్ నివేదిక అందించింది.
ఇదీ చదవండి: పంజాబ్లో జోరుగా 'పవర్ పాలిటిక్స్'
