Bhagwant mann: అవినీతి రహిత పాలన అందిస్తామని బాధ్యతలు చేపట్టిన పంజాబ్ ముఖ్యమంత్రి భగవంత్ మాన్.. ఆ వ్యాఖ్యలకు కట్టుబడుతూ కీలక నిర్ణయం తీసుకున్నారు. అవినీతి ఆరోపణలు ఎదుర్కొంటున్న ఆరోగ్య శాఖ మంత్రి విజయ్ సింగ్లాను పదవి నుంచి తొలగించారు. కాంట్రాక్టులపై సింగ్లా సహా పలువురు అధికారులు 1 శాతం కమీషన్ తీసుకుంటున్నట్లు ఆధారాలు ఉండటం వల్ల ఈ సీఎం వారిపై చర్యలు చేపట్టారు. అనంతరం ఆయనను ఏసీబీ అధికారులు అరెస్ట్ చేశారు.
"రాష్ట్రంలో ఒక్క శాతం అవినీతి జరిగినా సహించేది లేదు. ప్రజలు ఎన్నో అంచనాల మధ్య ఆమ్ఆద్మీ పార్టీకి అధికారం అప్పగించారు. వారి అంచనాలను అందుకునే విధంగా పనిచేయడం మా బాధ్యత. కేజ్రీవాల్ నేతృత్వంలో అవినీతిని పారదోలేందుకు కృషి చేస్తాం"
-భగవంత్ మాన్, పంజాబ్ సీఎం
సింగ్లాను భగవంత్ మాన్ పదవి నుంచి తప్పించడంపై ఆప్ అధ్యక్షుడు, దిల్లీ ముఖ్యమంత్రి కేజ్రీవాల్ హర్షం వ్యక్తం చేశారు. భగవంత్ తీసుకున్న నిర్ణయం పట్ల దేశం గర్విస్తోందని ప్రశంసించారు. "నిజానికి ఈ విషయం గురించి మీడియాకు, ప్రతిపక్షాలకు తెలియదు. కాబట్టి మాన్ కావాలనుకుంటే నిందితుల నుంచి వాటా కోరి వారిని పదవి నుంచి తప్పించకుండా చేయొచ్చు. కానీ మాన్ అలా చేయలేదు. తప్పు చేసినందుకు మంత్రిపై చర్యలు తీసుకున్నారు. భగవంత్.. మేము మిమ్మల్ని చూసి గర్వపడుతున్నాము." అని కేజ్రీవాల్ పేర్కొన్నారు. అంతకుముందు.. 2015లో దిల్లీలోని ఆమ్ఆద్మీ ప్రభుత్వం కూడా ఇటువంటి నిర్ణయమే తీసుకుంది. అవినీతి ఆరోపణలు ఎదుర్కొన్న ఓ కేబినెట్ మంత్రిని కేజ్రీవాల్ పదవి నుంచి తప్పించారు.
ఇదీ చూడండి : 'ప్రధాని మోదీ విజన్లో వాళ్లు మాత్రమే ఉంటారు'
