ఉగ్రవాదంపై పోరులో భారత్ మరో ముండడుగు వేయనుంది. ఉగ్రకార్యకలాపాలపై పటిష్ఠ నిఘా వహించే నేషనల్ ఇంటెలిజెన్స్ గ్రిడ్- NATGRIDను ప్రధాని నరేంద్ర మోదీ త్వరలో ప్రారంభించనున్నట్లు అధికారిక వర్గాలు తెలిపాయి. 26/11 ముంబయి ఉగ్రదాడుల అనంతరం ఇలాంటి పటిష్ఠ నిఘా వ్యవస్థ ఏర్పాటుపై సుదీర్ఘ చర్చ జరిగింది. ఈ గ్రిడ్ ద్వారా ముష్కరుల కదలికలను పసిగట్టి.. ఉగ్రదాడులను నియంత్రించవచ్చు. ఉగ్రవాదుల సమాచారంతో పాటు ఆర్థిక నేరాలు, ఇతర కీలక విషయాలు దీని ద్వారా తెలుస్తాయని హోంమంత్రి అమిత్ షా తెలిపారు.
ఈనెల 4న బ్యూరో ఆఫ్ పోలీస్ రీసెర్చ్ అండ్ డెవలప్మెంట్ 51 వ్యవస్థాపక దినోత్సవ కార్యక్రమంలో పాల్గొన్నారు షా. కరోనా రాకపోయి ఉంటే నాట్గ్రిడ్ను ఇప్పటికే ప్రధాని దేశానికి అంకితం చేసేవారని తెలిపారు. త్వరలోనే దీన్ని ప్రారంభిస్తారని పేర్కొన్నారు.
ఏంటీ నాట్గ్రిడ్?
నాట్గ్రిడ్లో వలసలు, బ్యాంకింగ్, ఆర్థిక లావాదేవీలు, క్రెడిట్ కార్డు వినియోగం, టెలికాం, వ్యక్తిగత పన్ను చెల్లింపుదారులు, విమాన- రైల్వే సర్వీసు సహా ఇతర నిఘా వ్యవస్థకు సంబంధించిన డేటా ఉంటుంది. తొలిదశలో 10 యూజర్ ఏజెన్సీలు(ఐబీ, సీబీఐ వంటివి), 21 సర్వీసు ప్రొవైడర్లు ఈ గ్రిడ్తో అనుసంధానమవుతారు. మరో దశలో 950 సంస్థలు, రానున్న సంవత్సరాల్లో 1000 కంపెనీలు గ్రిడ్లో భాగమవుతాయి.
సీబీఐ, డీఆర్ఐ, ఈడీ, సీబీఐటీ, సీబీడీటీ, కేబినెట్ సెక్రెటేరియేట్, ఐబీ, జీఎస్టీ ఇంటెలిజెన్స్ డైరెక్టరేట్ జనరల్, ఎన్సీబీ, ఎఫ్ఐబీ, ఎన్ఐఏ వంటి సంస్థలను నాట్గ్రిడ్ను వినియోగించేందుకు అనుమతించనున్నారు.
రూ.3,400 కోట్లతో నాట్గ్రిడ్ ప్రాజెక్టుకు 2010లో కేబినెట్ కమిటీ(భద్రత) ఆమోదం తెలిపింది. 2012 తర్వాత దీని ప్రక్రియ నెమ్మదించింది. 2014లో మోదీ అధికారంలోకి వచ్చాక మళ్లీ పునర్ ప్రారంభించారు.
2006-2009 మధ్య కాలంలో అమెరికాకు చెందిన తీవ్రవాది డేవిడ్ హెడ్లీ కదలికలను నిఘా సంస్థలు పసిగట్టలేకపోయాయి. ఆ సమయంలోనే అతడు లష్కరే తొయిబా ఉగ్రసంస్థకు కీలక సమాచారం, వీడియోలను చేరవేశాడు. ఆ సంస్థే ముంబయి దాడులకు పాల్పడి 166 మందిని బలిగొంది. అప్పుడే నాట్గ్రిడ్ ఏర్పాటుకు బీజం పడింది.
ఇదీ చదవండి: 'కాంగ్రెస్లో మేం కోరుకున్న ప్రక్షాళన మొదలైంది'
