వ్యాక్సిన్ ఉత్పత్తి సామర్థ్యాన్ని పెంచాలని టీకా తయారీ సంస్థలను ప్రధాని నరేంద్ర మోదీ కోరారు. రికార్డు సమయంలో కొవిడ్-19 టీకా డోసులను ఉత్పత్తి చేయటంపై హర్షం వ్యక్తం చేశారు. వ్యాక్సిన్ తయారీదారులతో ప్రధాని వీడియో కాన్ఫరెన్స్ ద్వారా భేటీ అయ్యారు. వ్యాక్సిన్ ఉత్పత్తి సజావుగా సాగేందుకు కేంద్రం నుంచి అవసరమైన సాయం అందిస్తామని స్పష్టం చేశారు.
ప్రపంచంలోనే అత్యంత తక్కువ ధరకు కరోనా వ్యాక్సిన్ను తయారు చేస్తున్న దేశం భారత్ అన్నారు మోదీ. ప్రపంచంలోనే అతిపెద్ద వ్యాక్సినేషన్ కార్యక్రమం మనదేశంలో జరుగుతోందన్నారు. టీకా కార్యక్రమంలో ప్రైవేట్ వైద్య రంగం క్రియాశీల పాత్ర పోషించాలన్నారు.
ఈ సందర్భంగా 18 ఏళ్లు నిండిన వారికి వ్యాక్సిన్ అందిస్తామని మోదీ ప్రకటించంపై టీకా తయారీదారులు హర్షం వ్యక్తం చేశారు. ప్రధానికి కృతజ్ఞతలు తెలిపారు.
వీడియో కాన్ఫరెన్స్ ద్వారా జరిగిన ఈ సమావేశానికి భారత్ బయోటెక్‌ ఎండీ కృష్ణ ఎల్ల, జేఎండీ సుచిత్ర, సీరం సంస్థ సీఈఓ అదర్‌ పూనావాలా సహా డాక్టర్ రెడ్డీస్ ల్యాబ్స్‌, జెన్నోవా బయోఫార్మాస్యుటికల్స్, జైడస్ క్యాడిలా, బయోలాజికల్ ఈ సంస్థ ప్రతినిధులు హాజరయ్యారు.
