భూటాన్లో రెండో దశ రూపే కార్డు సేవలను.. ఆ దేశ ప్రధాని లొటాయ్ షెరింగ్తో కలిసి ప్రారంభించారు ప్రధానమంత్రి నరేంద్ర మోదీ. వీడియో కాన్ఫరెన్స్ ద్వారా ఈ కార్యక్రమంలో పాల్గొన్నారు మోదీ. ఈ సందర్భంగా ఇరుదేశాల మధ్య సంబంధాలు మరింత బలోపేతం కావాల్సిన అవసరం ఉందన్నారు.
భూటాన్ ఉపగ్రహాన్ని అంతరిక్షానికి పంపేందుకు ఇస్రో సన్నద్ధత, బీఎస్ఎన్ఎల్తో మూడోదశ అంతర్జాతీయ ఇంటర్నెట్ గేట్వే ఒప్పందం వంటి కీలక అంశాల్లో ఇరు దేశాలు సహకారం అందించుకోవాల్సిన అవసరం ఉందని సూచించారు మోదీ.
" కొవిడ్ విపత్తు సమయంలో భూటాన్కు భారత్ మద్దతుగా నిలిచింది. వారికి అవసరమైన సాయం చేయటం ఎల్లప్పుడూ మనకు ప్రధానమే. ఇస్రో సాయంతో వచ్చే ఏడాది భూటాన్ ఉపగ్రహాన్ని అంతరిక్షంలోకి పంపే పనులు వేగవంతంగా జరగటం నాకు చాలా సంతోషంగా ఉంది. అందుకోసం భూటాన్కు చెందిన నలుగురు ఇంజినీర్లు డిసెంబర్లో ఇస్రోకు వెళ్లనున్నారు. ఆ నలుగురికి నా అభినందనలు."
- నరేంద్ర మోదీ, ప్రధానమంత్రి.
మోదీకి కృతజ్ఞతలు..
కరోనా మహమ్మారిని నియంత్రించటంలో ప్రధాని మోదీ తన నాయకత్వాన్ని ప్రదర్శించారని ప్రశంసించారు భూటాన్ ప్రధాని లొటాయ్ షెరింగ్. కరోనా మహమ్మారి నుంచి భారత్ సమర్థవంతంగా బయటపడుతుందనే నమ్మకం ఉందని ఆశాభావం వ్యక్తం చేశారు. వ్యాక్సిన్ అభివృద్ధిలో భారత్ చొరవ.. తమకు ఎంతో భరోసా ఇస్తోందన్నారు. భూటాన్కు వ్యాక్సిన్ అందిస్తామని భరోసా ఇచ్చినందుకు ప్రధాని మోదీ, భారత ప్రభుత్వానికి కృతజ్ఞతలు తెలిపారు.
గతేడాది ఆగస్టులో తొలిదశ..
గతేడాది ఆగస్టులో మోదీ భూటాన్ పర్యటన సందర్భంగా.. తొలిదశ రూపే కార్డులను ఇరువురు ప్రధానులు సంయుక్తంగా ప్రారంభించారు. తొలిదశ రూపే కార్డులు అమలు కావడం వల్ల.. భూటాన్లో ఏటీఎం కేంద్రాలు, పాయింట్ ఆఫ్ సేల్(పీఓఎస్) వంటి సర్వీసులు మొదలయ్యాయి. భారత్కు చెందిన రూపే కార్డుతో డెబిట్, క్రెడిట్ చెల్లింపులు సహా.. ఇ-కామర్స్ సైట్లలో అన్నిరకాల లావాదేవీలు జరుగుతాయి.
ఇదీ చూడండి: ఔషధ వ్యవస్థ అనుసంధానాన్ని తప్పుబట్టిన ఐఎంఏ
