ముంచుకొస్తున్న నివర్ తుపానును ఎదుర్కొనేందుకు తమిళనాడు, పుదుచ్చేరి ప్రభుత్వాలు సర్వ సన్నద్ధమయ్యాయి. అధికారులు ఎప్పటికప్పుడు పరిస్థితులను సమీక్షిస్తున్నారు. సహాయక చర్యలను చేపట్టేందుకు ఎన్డీఆర్ఎఫ్ బృందం ఇప్పటికే రంగంలోకి దిగింది. తమిళనాడులో 12, పుదుచ్చేరిలో 2, కరైకల్లో 1 సహా మొత్తం 30 బృందాలు సిద్ధంగా ఉన్నట్టు ప్రకటించింది ఎన్డీఆర్ఎఫ్.
తుపాను నేపథ్యంలో ఆయా ప్రభుత్వాలు ముందస్తు చర్యలు చేపట్టాయి. తమిళనాడు రాజధాని చెన్నై సహా 7 జిల్లాల్లో బస్సు సర్వీసులను నిలిపివేశారు అధికారులు. తుపాను ముప్పు ఉన్న జిల్లాల్లో రైలు సేవలకు కూడా అంతరాయం ఏర్పడింది.
పుదుచ్చేరిలో మంగళవారం రాత్రి 9 గంటల నుంచి గురువారం ఉదయం 6 గంటల వరకు కర్ఫ్యూ విధించింది యంత్రాంగం. ఈ సమయంలో అత్యవసర సేవలకు మాత్రమే అనుమతి ఉంటుందని స్పష్టం చేసింది.
సీఎంల సమీక్ష...
తీర ప్రాంతంలో సహాయక చర్యల ఏర్పాట్లను పుదుచ్చేరి ముఖ్యమంత్రి నారాయణసామి స్వయంగా వెళ్లి సమీక్షించారు. అన్ని విభాగాలు హైఅలర్ట్లో ఉన్నాయని, విద్యుత్తు-నీటి సరఫరాను పునరుద్ధరించేందుకు సమన్వయంతో పనిచేస్తున్నామని పేర్కొన్నారు. ఎలాంటి ప్రాణ నష్టం కలగకుండా చూసుకునేందుకు తీవ్రంగా శ్రమిస్తున్నట్టు స్పష్టం చేశారు.
నివర్ తుపాను నేపథ్యంలో బుధవారం రాష్ట్రం మొత్తానికి సెలవు ప్రకటించారు తమిళనాడు ముఖ్యమంత్రి పళనిస్వామి.
భారీ వర్షాలు..
నివర్ తుపాను.. బుధవారం(నవంబర్ 25న) తమిళనాడు, పుదుచ్చేరి తీరాలను దాటే అవకాశముందని భారత వాతావరణ శాఖ తెలిపింది. ఈ నేపథ్యంలో ఉత్తర తమిళనాడు జిల్లాల్లో బుధవారం భారీ వర్షాలు కురిసే అవకాశముందని భారత వాతావరణశాఖ వెల్లడించింది. ఇప్పటికే చెన్నై సహా మరికొన్ని ప్రాంతాల్లో జోరుగా వానలు పడుతుండగా... స్థానికులు ఇబ్బందులకు గురవుతున్నారు.
ఇదీ చూడండి:- 'హిందువా.. ముస్లిమా అనవసరం- మేజర్లా.. కాదా?'
