PM Modi Manipur Visit: మణిపుర్ సహా ఈశాన్య భారతాన్ని గత ప్రభుత్వాలు పూర్తిగా విస్మరించాయని ప్రధానమంత్రి నరేంద్ర మోదీ ఆరోపించారు. కొండ ప్రాంతాలు- లోయ ప్రాంతాలు అంటూ భేదాలు సృష్టించారని మండిపడ్డారు. ప్రస్తుతం.. తమ పాలనలో మణిపుర్ అభివృద్ధి, శాంతికి చిహ్నంగా ఉందని తెలిపారు.
ఈ ఏడాది ఎన్నికలు జరగనున్న మణిపుర్లో మంగళవారం పర్యటించారు మోదీ. అక్కడ ఏర్పాటు చేసిన ర్యాలీలో ప్రసంగించారు.
"దిల్లీలోని గత ప్రభుత్వాలు మణిపుర్ను విస్మరించాయి. కొండలు- లోయలు అంటూ భేదాలు సృష్టించేందుకు కుట్రపన్నాయి. కానీ ఇప్పుడు పరిస్థితులు మారిపోయాయి. ఇక్కడ హింస లేదు. గత ప్రభుత్వాల చర్యలతో మణిపుర్, ఈశాన్య భారత ప్రజలు ఏకాకిగా మిగిలిపోయారు. నేను ప్రధానినైన తర్వాత.. దేశాన్ని ఏకం చేసేందుకు చర్యలు చేపట్టాము."
--- నరేంద్ర మోదీ, ప్రధాన మంత్రి.
ఇంఫాల్లో రూ.4,815కోట్లు విలువ చేసే పలు అభివృద్ధి పనులకు శంకుస్థాపన చేశారు మోదీ. 13 ప్రాజెక్టులను జాతికి అంకితం చేశారు. వీటిల్లో 5 జాతీయ రహదారుల నిర్మాణ ప్రాజెక్టులు, ప్రభుత్వ రెసిడెన్షియల్ క్వార్టర్లు, మణిపుర్ ఇన్స్టిట్యూట్ ఆఫ్ పెర్ఫార్మెన్స్ ఆర్ట్స్, సీఐఐఐటీ(సెంటర్ ఫర్ ఇన్నోవేషన్, ఇంక్యుబేషన్, ట్రైనింగ్), కేన్సర్ ఆసుపత్రి ఉన్నాయి. మణిపుర్వాసుల ఆరోగ్య సేవలను మెరుగుపరచడం, యువతకు ఉద్యోగాలు ఇవ్వడం సహా మొత్తం మీద రాష్ట్రాన్ని అన్ని విధాలుగా అభివృద్ధి చేయడం ఈ ప్రాజెక్టులతో సాధ్యపడుతుందని భాజపా చెబుతోంది.
ఇదీ చదవండి: 5వ తేదీన నీట్లో 'ఈడబ్ల్యూఎస్' కోటాపై సుప్రీం అత్యవసర విచారణ
