కరోనాను కట్టడి చేయడంలో ఉత్తర్ప్రదేశ్ ప్రభుత్వం చేపట్టిన చర్యలపై ప్రధాని నరేంద్ర మోదీ ప్రశంసలు కురిపించారు. రెండో దశ వ్యాప్తిని అడ్డుకున్న తీరు శ్లాఘనీయం అని పేర్కొన్నారు. అవినీతి, వారసత్వ రాజకీయాలకు అవకాశం లేకుండా అభివృద్ధికే యూపీ ప్రభుత్వం ప్రాధాన్యం ఇచ్చిందన్నారు. గురువారం వారణాసి పర్యటన సందర్భంగా ఈ వ్యాఖ్యలు చేశారు మోదీ.
"ఈ రోజు రాష్ట్రంలో శాంతి భద్రతలు అమలు అవుతున్నాయి. మాఫియా, తీవ్రవాదం అదుపులోకి వచ్చాయి. మహిళల మీద అఘాయిత్యాలకు పాల్పడాలనుకునే వారికి.. తాము తప్పించుకోలేమని స్పష్టం అయింది. అవినీతికి అవకాశం లేకుండా అభివృద్ధికే ప్రాధాన్యం ఇవ్వడం వల్ల పథకాలు ప్రజలకు చేరుతున్నాయి. కొత్త పెట్టుబడులు రావడం సహా ఉద్యోగ అవకాశాలు పెరుగుతున్నాయి. ఉత్తర భారతానికి కాశీ అతిపెద్ద మెడికల్ హబ్గా ఏర్పడనుంది. కాశీలో ఇప్పుడు అన్ని రకాల వ్యాధులకు మెరుగైన చికిత్స అందుతోంది."
-నరేంద్ర మోదీ, ప్రధాని
1500 కోట్ల ప్రాజెక్టులు ప్రారంభం..
పర్యటన సందర్భంగా ప్రధాని.. రూ.1500 కోట్లు విలువ చేసే ప్రాజెక్టులకు శ్రీకారం చుట్టారు. ఈ ప్రాజెక్టుల్లో మల్టీలెవెల్ పార్కింగ్‌, గంగా నదిలో పర్యటకాభివృద్ధికి ఉద్దేశించిన రోరో బోట్ల ఏర్పాటు ఉన్నాయి. వారణాసి- ఘాజీపుర్ జాతీయ రహదారిపై నిర్మించిన మూడు లైన్ల ఫ్లైఓవర్‌ వంతెన కూడా ఈ ప్రాజెక్టులో భాగం.
వీటితో పాటు బెనారస్‌ హిందూ విశ్వవిద్యాలయం (బీహెచ్‌యూ)లోని ఎంసీహెచ్‌లో 100 పడకల ఆసుపత్రిని, జపాన్‌ సహకారంతో నిర్మించిన ఇంటర్నేషనల్‌ కో-ఆపరేషన్‌ అండ్‌ కన్వెన్షన్‌ సెంటర్‌ 'రుద్రాక్ష్‌'ను ప్రారంభించారు.
మోదీ పాలనతోనే..
మోదీ పాలనలో కాశీ ప్రత్యేక గుర్తింపు పొందిందని యూపీ సీఎం యోగి ఆదిత్యనాథ్ తెలిపారు. అభివృద్ధిలో కాశీ ఉన్నత శిఖరాలకు చేరుకుంటోందని వ్యాఖ్యానించారు. అభివృద్ధిలో.. స్మార్ట్ కాశీ దేశానికి, ప్రపంచానికి కూడా ఆదర్శంగా నిలుస్తోందని పేర్కొన్నారు.
ఇదీ చదవండి : జమ్మూ వైమానిక స్థావరం వద్ద డ్రోన్ కలకలం
