ఒక వ్యవస్థపై నిరసన వ్యక్తం చేయడం, దేశంపై నిరసన తెలపడం ఒక్కటి కాదని దిల్లీలోని 'జవహర్లాల్ నెహ్రూ విశ్వవిద్యాలయం' (జేఎన్యూ) విద్యార్థి నేత నటాషా నర్వాల్ చెప్పారు. కఠినమైన 'చట్ట వ్యతిరేక కార్యకలాపాల నిరోధక చట్టం' (యూఏపీఏ) కింద అరెస్టయి, ఇటీవల బెయిల్పై విడుదలైన ఆమె 'ఈటీవీ భారత్'తో మాట్లాడారు.
దేశంపై, వ్యవస్థపై నిరసన మధ్య తేడాను యూఏపీఏ నిర్వచించడం లేదని చెప్పారు. దోషిగా రుజువయ్యేవరకు ఎవరైనా అమాయకులేననే నేర న్యాయ మూల స్వరూపాన్ని ఈ చట్టం ఉల్లంఘిస్తోందని విమర్శించారు.
"ఈ చట్టాన్ని రద్దు చేయాలని నేనేమీ చెప్పడం లేదు. బెయిల్ నిబంధనల గురించే నా కలవరమంతా. బెయిల్ ఇవ్వకపోవడం ప్రాథమిక హక్కులకు విరుద్ధం. విచారణలో దోషిగా రుజువయ్యేలోగానే ఒక వ్యక్తిపై ఉగ్రవాదిగా ముద్ర వేసే అధికారం ఆందోళనకరం. నిర్దోషిత్వాన్ని రుజువు చేసుకునే భారం నిందితునిపైనే పడుతోంది. ఇలా రుజువు చేసుకోలేక 10-20 ఏళ్ల పాటు కారాగారాల్లోనే మగ్గిపోయిన అనేక మందిని మనం చూశాం. సుదీర్ఘ విచారణ తరువాత అభియోగాల నుంచి విముక్తి లభించినా వారు కోల్పోయిన విలువైన కాలాన్ని ఎవరు తిరిగి ఇస్తారు?"
-నటాషా నర్వాల్, జేఎన్యూ విద్యార్థి నేత
ప్రభుత్వ విధానాలను ప్రశ్నిస్తే దేశ వ్యతిరేకులుగా ముద్ర వేస్తున్నారని మరో నాయకురాలు దేవాంగన కలిత ఆరోపించారు. తమ ఉద్యమం కొనసాగుతుంది చెప్పారు.
ఇదీ చూడండి: డ్రోన్లతో ఇంటికే మెడిసిన్- దేశంలో తొలిసారి
