దేశంలోని పలువురు కేంద్ర మంత్రులు, ప్రతిపక్ష నేతలు, జర్నలిస్టుల ఫోన్ల హ్యాకింగ్పై దుమారం చెలరేగింది. ఈ అంశంపై భాజపా, కాంగ్రెస్ మధ్య మాటల యుద్ధం మొదలైంది. ఈ వ్యవహారంలో ప్రధానమంత్రి, కేంద్ర హోంమంత్రి హస్తం ఉందని ఆరోపించారు రాజ్యసభలో ప్రతిపక్ష నేత మల్లికార్జున్ ఖర్గే. అమిత్ షా రాజీనామా చేయాలని డిమాండ్ చేశారు.
" రాహుల్ గాంధీ సహా ప్రతిపక్ష నేతలు, జర్నలిస్టులు, కేంద్ర మంత్రులపైనా.. ప్రధాని, హోంమంత్రి దాడులు చేస్తున్నారు. ఫోన్ల ట్యాపింగ్పై దర్యాప్తు చేపట్టే ముందే అమిత్ షా రాజీనామా చేయాలి. మోదీపైనా ఈ దర్యాప్తు జరగాలి. "
- మల్లికార్జున్ ఖర్గే, రాజ్యసభలో ప్రతిపక్ష నేత
డిజిటల్ ఇండియాను ప్రధాని మోదీ ప్రమోట్ చేస్తానని చెప్పారని, కానీ, ప్రస్తుతం నిఘా భారత్ను చూస్తున్నామని ఆరోపించారు లోక్సభలో కాంగ్రెస్పక్ష నేత అధిర్ రంజన్ చౌదరి. తమ ఉత్పత్తులను ప్రభుత్వం ప్రత్యేకంగా నేరాలు, ఉగ్రవాదాన్ని నిరోధించేందుకే వినియోగిస్తోందని ఎన్ఎస్ఓ చెబుతోందని, కానీ, వారు పెగాసస్ను మోదీకి వ్యతిరేకంగా మాట్లాడేవారిపై ప్రయోగిస్తున్నారని దుయ్యబట్టారు. విపక్షాల తరఫున పార్లమెంట్లో ఈ విషయాన్ని లేవనెత్తుతామని తెలిపారు.
తిప్పికొట్టిన భాజపా..
కాంగ్రెస్ ఆరోపణలు నిరాధారమైనవని, వాటిని ఖండిస్తున్నామని తెలిపారు రవిశంకర్ ప్రసాద్.
" ఫోన్ల ట్యాపింగ్ గురించి చెబుతున్న వారు.. ఆ డేటాబేస్లో ఉన్న ఏదైనా నంబర్కు పెగాసస్తో సంబంధం ఉన్నట్లు నిర్ధరించలేదు. ఇది చాలా వింత పరిస్థితి. పెగాసస్ ప్రాజెక్ట్ రిపోర్ట్లో చూపిన వాటిని ఎన్ఎస్ఓ తిరస్కరించింది. గందరగోళ పరిస్థితులు సృష్టించేందుకు పార్లమెంట్ వర్షాకాల సమావేశాలకు ముందు పెగాసస్ కథను పక్కా ప్రణాళితో వెలుగులోకి తీసుకొచ్చారా? ది వైర్ పేరు కూడా బయటకు వచ్చింది. కానీ వారి కథనాల్లో చాలా వరకు తప్పు అని తేలడం నిజం కాదా? పెగసస్తో భాజపా, కేంద్రానికి సంబంధం ఉందని రుజువు చేసే సాక్ష్యాలు ఏమీ లేవు."
- రవిశంకర్ ప్రసాద్, కేంద్ర ఐటీ శాఖ మాజీ మంత్రి.
'ముఖ్యమైన కార్యకలాపాల సమయంలోనే ఇలాంటివి ఎందుకు వస్తున్నాయి? ట్రంప్ పర్యటన సందర్భంగా అల్లర్లు జరిగాయి. 2019 ఎన్నికల సమయంలో పెగాసస్ స్టోరీ చక్కర్లు కొట్టింది. పార్లమెంట్ సమావేశాలు, కాంగ్రెస్ దుర్భర పరిస్థితుల్లో ఉన్న సమయంలోనే మళ్లీ వెలుగులోకి వచ్చింది ' అని ప్రశ్నించారు రవిశంకర్ ప్రసాద్.
