పార్లమెంట్ వర్షాకాల సమావేశాల్లో భాగంగా 8వ రోజు కూడా విపక్షాల నిరసనలతో ఉభయ సభలు హోరెత్తాయి. పెగసస్, సాగు చట్టాలపై చర్చకు పట్టుపట్టాయి. నిరసనలతో ఉభయ సభల్లో వాయిదాల పర్వం కొనసాగింది.
లోక్సభలో..
లోక్సభ ప్రారంభం కాగానే స్పీకర్ ఓం బిర్లా బుధువారం సభలో జరిగిన సంఘటనలపై విచారం వ్యక్తం చేశారు. విపక్ష సభ్యులు కాగితాలు చించి స్పీకర్ స్థానం వైపు విసరడం తనను బాధించిందని అన్నారు. ఇలాంటివి పునరావృతం కాకుండా చూసి.. సభ్యులంతా సభ గౌరవాన్ని పెంచాలని విజ్ఞప్తి చేశారు. అనంతరం మాట్లాడిన కాంగ్రెస్ పక్ష నేత అధీర్ రంజన్ .. ప్రభుత్వ మొండి వైఖరి వల్ల విపక్షాలు తమ వాదనను వినిపించలేకపోతున్నాయని ఆందోళన వ్యక్తం చేశారు. ఈ దశలో జోక్యం చేసుకున్న పార్లమెంటరీ వ్యవహారాల మంత్రి ప్రహ్లాద్ జోషి.. బుధవారం కాగితాలు చింపి విరిసిన సభ్యులు క్షమాపణ చెప్పాలని కోరుకోవడం లేదని విమర్శించారు. దీనిపై విపక్షాలు ఆందళనకు దిగగా.. సభను 11.30 గంటల వరకు వాయిదా వేశారు స్పీకర్.
తిరిగి ప్రారంభమైన తర్వాత పెగసస్, సాగు చట్టాలకు వ్యతిరేకంగా విపక్షాల ఆందోళన మధ్యే ప్రశ్నోత్తరాలను కొనసాగించారు. ప్రశ్నోత్తరాల అనంతరం ప్యానెల్ స్పీకర్ రాజేంద్ర అగర్వాల్ శూన్య గంటను చేపట్టేందుకు సిద్ధం కాగా, విపక్షాలు నినాదాలతో సభను హోరెత్తించాయి. దీంతో సభను 12.30 గంటల వరకు రెండోసారి, 2 గంటల వరకు మూడోసారి వాయిదా వేశారు. విపక్షాల ఆందోళనలకు అడ్డుకట్ట పడకపోవటం వల్ల లోక్సభను శుక్రవారానికి వాయిదా వేశారు.
రాజ్యసభలో..
రాజ్యసభలోనూ విపక్షాల ఆందోళన కొనసాగింది. సభా కార్యక్రమాలు ప్రారంభం కాగానే.. పెగసస్ సహా తాము లేవనెత్తిన అంశాలపై చర్చించేందుకు వీలుగా రోజువారీ కార్యకలాపాలను రద్దు చేయాలని విపక్షాలు ఇచ్చిన నోటీసులను తిరస్కరిస్తున్నట్లు ఛైర్మన్ వెంకయ్య నాయుడు ప్రకటించారు. దీనిపై కాంగ్రెస్ సభ్యులు అభ్యంతరం వ్యక్తం చేశారు. తృణమూల్ కాంగ్రెస్ సభ్యులు వెల్లోకి వచ్చి నిరసన తెలపగా, కాంగ్రెస్ సభ్యులు కూడా వారితో జత కలిశారు. వెనక్కి వెళ్లాలని ఛైర్మన్ విజ్ఞప్తి చేయగా..విపక్ష సభ్యులు వెనక్కి తగ్గలేదు. ఈ దశలో చట్టసభ్యుల ప్రవర్తనపై బుధవారం సుప్రీం కోర్టు చేసిన వ్యాఖ్యలను వెంకయ్య గుర్తు చేశారు. అయినా విపక్షాలు శాంతించకపోవటం వల్ల సభను 12 గంటల వరకు వాయిదా వేశారు. తిరిగి ప్రారంభమైన తర్వాత కూడా ఆందోళనను కొనసాగించగా.. సభను 2 గంటల వరకు వాయిదా వేశారు.
నిరసనలతో సభా కార్యకలాపాలకు అడ్డుపడటంపై ఆందోళన వ్యక్తం చేశారు ఛైర్మన్ వెంకయ్య నాయుడు. దాని ద్వారా 90 మంది సభ్యులు అందించిన ప్రజాప్రయోజనాల నోటీసులను అంగీకరించినా.. వారికి సభలో చర్చించే అవకాశం రాకపోవటం బాధాకరమన్నారు. మొత్తం 69 జీరో హవర్ అంశాలు ఉండగా.. అందులో ఇవాళ 12 అంశాలపై చర్చించాల్సి ఉందన్నారు. 23 ప్రత్యేక అంశాలు ఉన్నప్పటికీ వాటిపైనా చర్చించలేకపోయమన్నారు.
బిల్లుకు ఆమోదం..
సభ ప్రారంభమైన తర్వాత ఆర్థిక మంత్రి నిర్మలా సీతారామన్.. 202- ఫ్యాక్టోరింగ్ నియంత్రణ సవరణ బిల్లును ప్రవేశపెట్టారు. విపక్షాల నిరసనల మధ్యే రాజ్యసభ ఆ బిల్లుకు ఆమోదం తెలిపింది.
విపక్షాల నిరసనలు కొనసాగిన క్రమంలో సభను శుక్రవారానికి వాయిదా వేశారు.
ఇదీ చూడండి: ప్రజాస్వామ్యంపై నిఘానేత్రం.. కఠిన ఆంక్షలతోనే అడ్డుకట్ట
