Omicron India: దిల్లీలో మొత్తం 10 ఒమిక్రాన్ వేరియంట్ కేసులు వెలుగుచూసినట్లు ఆరోగ్యమంత్రి సత్యేంద్రజైన్ తెలిపారు. ఈ వైరస్ సోకిన వారిలో ఒక్కరు ఆస్పత్రి నుంచి డిశ్చార్జి కాగా మిగతా వారు చికిత్స పొందుతున్నట్లు చెప్పారు. వారి ఆరోగ్య పరిస్థితి నిలకడగానే ఉన్నట్లు వివరించారు. ఎవరిలోనూ తీవ్ర లక్షణాలు కనిపించలేదన్నారు.
లోక్నాయక్ ఆస్పత్రిలో మొత్తం 40 మంది కరోనా అనుమానితులు ప్రత్యేక వసతులతో ఐసోలేషన్లో ఉన్నట్లు జైన్ వెల్లడించారు. వీరిలో 38మందికి పాజిటివ్గా తేలిందని చెప్పారు. ఒమిక్రాన్ వేరియంట్ సోకిన 10మందిలో ఒకరు కోలుకుని డిశ్చార్జ్ అయినట్లు వివరించారు. అంతర్జాతీయ పర్యటకులే బాధితులుగా ఉంటున్నారని పేర్కొన్నారు.
Karnataka omicron
కర్ణాటకలో గురువారం ఒక్కరోజే 4 ఒమిక్రాన్ కేసులు వెలుగు చూశాయి. బ్రిటన్, యూకే నుంచి వచ్చిన ఇద్దరికి, దిల్లీ నుంచి వచ్చిన మరో ఇద్దరికి పాజిటివ్గా తేలింది. దీంతో రాష్ట్రంలో మొత్తం ఒమిక్రాన్ కేసుల సంఖ్య 8కి చేరింది.
Gujarat omicron cases
గుజరాత్లో గురువారం మరో ఒమిక్రాన్ కేసు నమోదైంది. మెహ్సానా జిల్లా విజాపుర్ గ్రామానికి చెందిన ఆరోగ్య కార్యకర్తకు పాజిటివ్గా తేలింది. దీంతో రాష్ట్రంలో మొత్తం ఒమిక్రాన్ కేసుల సంఖ్య ఐదుకు పెరిగింది. బాధితురాలికి వాద్నగర్ ప్రభుత్వ ఆస్పత్రిలో ఐసోలేషన్ ఏర్పాటు చేసి చికిత్స అందిస్తున్నారు. ఈమె విదేశాల్లో పర్యటించలేదని, కానీ జింబాబ్వే నుంచి వచ్చిన బంధువును కలిసిందని అధికారులు తెలిపారు. డిసెంబర్ 10న ఈమెకు పాజిటివ్ రాగా.. శాంపిల్స్ను జినోమ్ సీక్వెన్సింగ్ పంపగా.. గురువారం ఒమిక్రాన్ వేరియంట్ అని తేలింది.
ఆరోగ్య కార్యకర్త భర్త ఇటీవలే మరణించారు. కుటుంబాన్ని పరామర్శించేందుకు అతని సోదరి, బావ జింబాబ్వే నుంచి వచ్చారు. అయితే కరోనా పరీక్షలో వారికి నెగెటివ్ వచ్చింది.
West bengal omicron news
బంగ్లాదేశ్ నుంచి బంగాల్కు వచ్చిన అనంతరం కరోనా పాజిటివ్గా తేలిన ఓ వ్యక్తికి జినోమ్ సీక్వెన్సింగ్లో ఒమిక్రాన్ నెగెటివ్ వచ్చిందని అధికారులు తెలిపారు. ఉత్తర 24 పరగణాలు జిల్లాకు చెందిన ఇతనికి డెసెంబర్ 10న నిర్వహించిన పరీక్షల్లో కరోనా ఉన్నట్లు తేలింది. జినోమ్ సీక్వెన్సింగ్లో డెల్టా వేరియంట్ సోకినట్లు నిర్ధరణ అయింది.
కొత్త కేసులతో కలిపి భారత్లో మొత్తం ఒమిక్రాన్ కేసుల సంఖ్య 70 దాటింది.
మరోవైపు ప్రపంచవ్యాప్తంగా ఒమిక్రాన్ ప్రబలుతోంది. ఇండోనేసియాలో తొలి కేసు వెలుగుచూసింది. రాజధాని జకార్తాలో ఓ ఆస్పత్రిలో పారిశుద్ధ్య కార్మికురాలికి ఈ వేరియంట్ సోకింది. దీంతో ప్రజలంతా జాగ్రత్తగా ఉండాలని అధ్యక్షుడు జోకో విడోడో విజ్ఞప్తి చేశారు. అత్యవసరమైతేనే విదేశీ ప్రయాణాలుండాలని సూచించారు.
japan omicron news
జపాన్ రాజధాని టోక్యోలోనూ తొలి ఒమిక్రాన్ కేసు బయటపడింది. డిసెంబర్ 8న విదేశాల నుంచి వచ్చిన ఇతనికి పరీక్షలు చేయగా నెగెటివ్గా తేలింది. అయితే ఐసోలేషన్కి వెళ్లిన మరునాడే జ్వరం రావడం వల్ల మరోసారి పరీక్షలు నిర్వహించగా పాజిటివ్ వచ్చింది. దీంతో దేశంలో ఒమిక్రాన్ బాధితుల సంఖ్య 34కు చేరింది.
బ్రిటన్లో ఒమిక్రాన్ శరవేగంగా వ్యాప్తి చెందుతున్న నేపథ్యంలో ఫ్రాన్స్ అప్రమత్తమైంది. బ్రిటన్ ప్రయాణాలపై ఆంక్షలు విధించింది. ఆ దేశం నుంచి వచ్చేవారు రెండు రోజులు ఐసోలేషన్లో ఉండాలని ఆదేశించింది.
ఇదీ చదవండి: అమ్మడం కోసమే పిల్లల్ని కన్న తండ్రి- రూ.31లక్షలకు ఐదుగురు!
