కుట్రలతో నన్ను అడ్డుకోలేరు: మమత

అసెంబ్లీ ఎన్నికల నేపథ్యంలో బంగాల్​లోని పురులియా జిల్లాలో ప్రచారం నిర్వహించారు ఆ రాష్ట్ర ముఖ్యమంత్రి మమతా బెనర్జీ. ప్రపంచంలోనే ఏ ప్రభుత్వమూ టీఎంసీలా పనిచేయలేదన్నారు. భాజపా, కాంగ్రెస్​, సీపీఎంపై విమర్శలు గుప్పించారు.

అసెంబ్లీ ఎన్నికల్లో ప్రచారం చేయకుండా తనను ఏ కుట్రలూ నిలువరించలేవన్నారు బంగాల్​ ముఖ్యమంత్రి మమతా బెనర్జీ. భాజపాతో పోరాటం కొనసాగిస్తానని తెలిపారు.

నందిగ్రామ్​ ఘటన తర్వాత తొలిసారి పురులియా జిల్లా ఝల్దాలో ఎన్నికల ప్రచారం నిర్వహించారు మమత. తన స్వరం, గుండె పనిచేసినంత కాలం పోరాటం కొనసాగిస్తానన్నారు.

" కొన్ని రోజుల్లోనే నా కాళ్లు బాగవుతాయి. బంగాల్​ గడ్డపై మీరు స్వేచ్ఛగా తిరుగుతారో లేదో నేనూ చూస్తాను. అసెంబ్లీ ఎన్నికల్లో గెలిచేందుకు భాజపా నేతలు దిల్లీ నుంచి వస్తున్నారు. కానీ, మీరు బంగాల్​ను దక్కించుకోలేరని చెబుతున్నా. టీఎంసీ ప్రభుత్వం పనిచేసినట్లుగా ప్రపంచంలోనే ఏ సర్కారు పనిచేయలేదు. ప్రధానమంత్రికి దేశాన్ని నడిపించే సామర్థ్యం లేదు. "

- మమతా బెనర్జీ, బంగాల్​ ముఖ్యమంత్రి.

టీఎంసీ ప్రభుత్వం అధికారాన్ని నిలబెట్టుకుంటుందని ధీమా వ్యక్తం చేశారు మమత. 'మీకు ఉచిత రేషన్​ కొనసాగుతుంది. ఇంటి వద్దే రేషన్​ను అందిస్తాం. మే తర్వాత మీరు చౌకధరల దుకాణానికి రావాల్సిన అవసరం లేదు'అని పేర్కొన్నారు మమత. భాజపా, కాంగ్రెస్​, సీపీఎంకు వ్యతిరేకంగా ' భాజపా వద్దు, కాంగ్రెస్​ వద్దు, సీపీఎం వద్దు, భాజపాకు వీడ్కోలు చెప్పండి.. ' అంటూ నినాదాలు చేశారు.

ఇదీ చూడండి: నామినేషన్​ వేసిన పళనిస్వామి, స్టాలిన్