తమిళ నటుడు 'సూర్య' హీరోగా నటించిన 'సింగం' సినిమాలో కనిపించిన నైజీరియన్ దేశస్థుడు, నటుడు చాక్విమ్ మాల్విన్.. డ్రగ్స్ కేసులో కర్ణాటక పోలీసులకు చిక్కాడు. బెంగళూరు కాడుగూండనహళ్లి పోలీసులు అతడ్ని అరెస్టు చేసి, కేసు నమోదు చేశారు. అతని వద్ద నుంచి రూ.8 లక్షల విలువ చేసే హ్యాష్ ఆయిల్ సహా ఎండీఎంఓ వంటి మత్తుపదార్థాలను పోలీసులు స్వాధీనం చేసుకున్నారు.
పలు సినిమాల్లో..
చాక్విమ్ కన్నడ సహా హిందీ, తమిళ భాషల్లో పలు చిత్రాల్లో కనిపించాడు. అన్నబాండ్, పరమాత్మ వంటి 20 కన్నడ సినిమాల్లో, తమిళ్లో సింగం, విశ్వరూపం సినిమాల్లో నటించి మెప్పించాడు.
ముంబయిలో యాక్టింగ్లో శిక్షణ
మెడికల్ వీసాపై భారత్కు వచ్చిన చాక్విమ్... ముంబయిలోని న్యూయార్క్ ఫిల్మ్ అకాడమీలో నటనలో శిక్షణ తీసుకున్నాడు. అంతకుముందు.. 2006లో అతడు ఆరు నెలలపాటు నైజీరియా రాజధాని అబుజాలోని న్యూయార్క్ ఫిల్మ్ అకాడమీలోనూ శిక్షణ తీసుకున్నాడు.
రెడ్హ్యాండెడ్గా దొరికాడు..
లాక్డౌన్ సమయంలో సినిమా అవకాశాలు రాకపోగా... చాక్విమ్ డ్రగ్స్ అమ్మకాలు ప్రారంభించినట్లు పోలీసులు చెప్పారు. కళాశాల విద్యార్థులు, వ్యాపారులకు అతడు డ్రగ్స్ సరఫరా చేశాడని తెలిపారు. ఆఫ్రికా నుంచి అక్రమంగా తరలించిన డ్రగ్స్ను అతడు విక్రయించేవాడని పేర్కొన్నారు. కాడుగూండనహళ్లి పోలీస్ స్టేషన్ పరిధిలో మత్తుపదార్థాలను విక్రయిస్తుండగా తాము రెడ్హ్యాండెడ్గా పట్టుకున్నామని వెల్లడించారు.
ఎవరెవరితో సంబంధం ఉంది?
చాక్విమ్ ఎన్నేళ్ల నుంచి డ్రగ్స్ విక్రయిస్తున్నాడు? అతనికి ఎవరెవరితో సంబంధాలు ఉన్నాయి? ఈ వ్యవహారంలో ఎవరైనా సినిమా ఇండస్ట్రీకి చెందిన నటీనటులు ఉన్నారా? అన్న కోణంలో పోలీసులు దర్యాప్తు చేస్తున్నారు.
ఇదీ చూడండి: TOLLYWOOD DRUGS CASE: టాలీవుడ్ డ్రగ్స్ కేసులో మరికొందరికి నోటీసులు జారీ చేస్తారా..?
