అంబానీ ఇంటి వద్ద పేలుడు పదార్థాల కేసులో పీపీఈ కిట్ ధరించి, సీసీటీవీ కెమెరాలకు చిక్కిన వ్యక్తి.. సచిన్ వాజేనే అని జాతీయ దర్యాప్తు సంస్థ బుధవారం స్పష్టం చేసింది. కారులో పేలుడు పదార్థాలను.. వాజేనే పెట్టారని ప్రకటించింది. ఎవరో ఆదేశిస్తినే ఆయన ఈ పని చేసినట్లు ఆరోపించిన ఎన్ఐఏ.. వారిని కనిపెట్టేందుకు యత్నిస్తున్నట్లు తెలిపింది.
"పెద్ద రుమాలుతో సచిన్ వాజే తన తల కనపడకుండా కప్పుకున్నారు. ఆయన ఓ పెద్ద కుర్తా-పైజామాను ధరించారు. శరీరాన్ని మొత్తం పీపీఈ కిట్ కప్పి ఉంచలేదు. తన బాడీ ల్యాంగ్వేజీని ఎవరూ గుర్తించకుండా చూసేందుకు ప్రయత్నించారు."
-జాతీయ దర్యాప్తు సంస్థ
సచిన్ వాజే క్యాబిన్ వద్ద అంతకుముందు ఓ ల్యాప్టాప్ను ఎన్ఐఏ స్వాధీనం చేసుకుంది. అయితే.. అందులోని సమాచారం మొత్తం ముందే డిలీట్ చేసి ఉందని తెలిపింది. తన సెల్ఫోన్ను ఉద్దేశపూర్వకంగానే సచిన్ వాజే ఎక్కడో పడేశారని చెప్పింది.
సచిన్ వాజేను ఎన్ఐఏ శనివారం అరెస్ట్ చేసింది. ఎన్ఐఏ ప్రత్యేక న్యాయస్థానం మార్చి 25 వరకు వాజేకు రిమాండ్ విధించింది.
ఈ కేసు విచారణలో భాగంగా వాజే నడిపిన మెర్సెడెస్ బెంజ్ కారును ఎన్ఐఏ అధికారులు స్వాధీనం చేసుకున్నారు. కారు నంబర్ ప్లేట్, రూ. 5లక్షలకు పైగా నగదు, నోట్లను లెక్కించే యంత్రం, కొన్ని వస్త్రాలను అందులో గుర్తించినట్లు ఎన్ఐఏ ఐజీ అనిల్ శుక్లా తెలిపారు.
'దాచి పెట్టొద్దు'
అంబానీ ఇంటి వద్ద పేలుడు పదార్థాలు దొరికిన కేసులో విచారణ వివరాలను దాచిపెట్టకుండా ఏం జరిగిదో ఎన్ఐఏ చెప్పాలని మహారాష్ట్ర మంత్రి, ఆ రాష్ట్ర ఎన్సీపీ అధ్యక్షుడు జయంత్ పాటిల్ డిమాండ్ చేశారు. సచిన్ వాజేను ఎన్ఐఏ అరెస్టు చేసిన నేపథ్యంలో.. మహారాష్ట్రలోని మహా వికాస్ అఘాడీ(ఎంవీఏ- శివసేన, ఎన్సీపీ, కాంగ్రెస్) నేతలు సమావేశమయ్యారు. అనంతరం జయంత్ పాటిల్ ఈ మేరకు డిమాండ్ చేశారు.
అయితే.. ఎంవీఏ సమావేశంలో సచిన్ వాజే అంశం చర్చించలేదని అంతకుముందు ఈ భేటీకీ హాజరైన శివసేన నేత ఏక్నాథ్ శిందే చెప్పడం గమనార్హం.
ఇదీ చూడండి:'అంబానీ ఇంటి వద్ద బాంబు'పై ఎన్ఐఏ దర్యాప్తు
