NIA Conducts Searches: దేశంలోని ఆరు రాష్ట్రాల్లో ఏకకాలంలో దాడులు నిర్వహించింది జాతీయ దర్యాప్తు సంస్థ(ఎన్ఐఏ). మహారాష్ట్ర, గుజరాత్, కర్ణాటక, ఉత్తర్ప్రదేశ్, బిహార్, మధ్యప్రదేశ్లో ఐసిస్ ఉగ్రవాద కార్యకలపాలకు సంబంధించి 13 ప్రాంతాల్లో సోదాలు నిర్వహించింది. మహారాష్ట్రలోని నాందేడ్, కొల్హాపుర్.. గుజరాత్లోని భరుచ్, సూరత్, నవ్సారి, అహ్మదాబాద్.. కర్ణాటకలోని భత్కల్, తుమ్కుర్.. బిహార్లోని ఆరియా.. మధ్యప్రదేశ్లోని భోపాల్.. యూపీలోని దేవ్బంధ్ జిల్లాలో ఈ దాడులు చేపట్టింది. ఈ సోదాల్లో కీలకమైన పలు పత్రాలు, వస్తువులను స్వాధీనం చేసుకున్నట్లు అధికారులు చెప్పారు. ఈ కేసును సుమోటోగా తీసుకున్న ఏన్ఐఎ జూన్ 25న పలు సెక్షన్ల కింద కేసు నమోదు చేసింది.
ఈ దాడుల్లో కర్ణాటకలోని భత్కల్లో ఉగ్రవాద సంస్థలతో సంబంధమున్న వ్యక్తిని జాతీయ దర్యాప్తు సంస్థ అదుపులోకి తీసుకున్నట్లు తెలుస్తోంది. ఆదివారం ఉదయం 4 గంటల సమయంలో సోదాలు నిర్వహించి.. 30ఏళ్ల వ్యక్తిని అరెస్టు చేసినట్లు సమాచారం. అతడిని రహస్య ప్రదేశానికి తరలించి విచారిస్తున్నట్లు తెలుస్తోంది. మరోవైపు ఈ దాడుల్లో ముగ్గురిని అదుపులోకి తీసుకుని విచారిస్తున్నామని గుజరాత్ యాంటీ టెర్రరిజం స్క్వాడ్ తెలిపింది. తీవ్రవాద సంస్థ పాపులర్ ఫ్రంట్ ఆఫ్ ఇండియాతో సంబంధం ఉందన్న ఆరోపణలతో బిహార్లోని నలంద జిల్లాలో గురువారమే సోదాలు నిర్వహించింది.
కేరళలోను జాతీయ దర్యాప్తు సంస్థ (ఎన్ఐఏ) దాడులు నిర్వహించింది. పోలీసులపై హత్యాయత్నం చేసిన సతిక్ బచ్చాకు సంబంధించిన కేసులో జాతీయ దర్యాప్తు సంస్థ సోదాలు నిర్వహించింది. తిరువనంతపురంలో నిర్వహించిన ఈ సోదాల్లో ఎలక్ట్రానిక్ వస్తువులు, పలు పత్రాలను స్వాధీనం చేసుకున్నట్లు అధికారులు చెప్పారు. మైలాద్తురాయ్ చెక్పోస్ట్ వద్ద పోలీసులు ఫిబ్రవరి 21న పోలీసులు తనిఖీలు చేశారు. ఈ క్రమంలోనే చెక్పోస్ట్ వద్దకు వచ్చిన వాహనాన్ని ఆపేందుకు ప్రయత్నించగా.. పోలీసులపైకి దూసుకొచ్చింది. దీనిపై మొదట పోలీసులు కేసు నమోదు చేయగా.. చట్టవ్యతిరేక కార్యకలపాల నిరోధక చట్టం కింద మళ్లీ కేసు నమోదు చేసింది జాతీయ దర్యాప్తు సంస్థ.
ఇవీ చదవండి: అమ్మకు అదిరే 'రిటైర్మెంట్' గిఫ్ట్.. హెలికాప్టర్లో ఇంటికి..
'ద్వితీయ శ్రేణి పౌరులుగా మైనారిటీలు! అలా చేస్తే దేశ విభజన ముప్పు!'
