Hizb ut Tahrir case Updates : అంతర్జాతీయ ఇస్లామిక్ రాడికల్స్ సంస్థ హిజ్బుత్ తహ్రీర్‌ను దేశ వ్యాప్తంగా విస్తరించడమే లక్ష్యంగా పనిచేస్తున్న నిందితులను జాతీయ దర్యాప్తు సంస్థ(NIA) అధికారులు అరెస్ట్ చేశారు. మే 24వ తేదీన భోపాల్‌తో పాటు హైదరాబాద్లో దాడులు చేసిన మధ్యప్రదేశ్‌కు చెందిన ఏటీఎస్ అధికారులు 16మందిని అరెస్ట్ చేశారు. వీళ్లలో భోపాల్‌కు చెందిన 11మంది, హైదరాబాద్‌కు చెందిన ఐదుగురిని అరెస్ట్ చేశారు. హిజ్బుత్ తహ్రీర్ కార్యకలాపాలను గుర్తించిన ఐబీ అధికారులు భోపాల్‌ పోలీసులను అప్రమత్తం చేశారు.
దీంతో ఏటీఎస్ అధికారులు ఏకకాలంలో భోపాల్‌, హైదరాబాద్లో దాడులు చేసి కరుడుగట్టిన 16మంది హిజ్బుత్ తహ్రీర్ కార్యకర్తలను అరెస్ట్ చేశారు. కేసు తీవ్రత దృష్ట్యా జాతీయ దర్యాప్తు సంస్థ విచారణ చేపట్టింది. పరారీలో ఉన్న సల్మాన్‌ను ఎన్ఐఏ అధికారులు ఇవాళ హైదరాబాద్‌లోని రాజేంద్రనగర్‌లో అరెస్ట్ చేశారు. నగరంలో 2చోట్ల సోదాలు నిర్వహించి హార్డ్ డిస్క్‌లు, పెన్ డ్రైవ్‌లు, ఎస్డీ కార్డులతో పాటు ఇస్లామిక్ తీవ్రవాదానికి సంబంధించిన కీలక పత్రాలు స్వాధీనం చేసుకున్నారు.
NIA arrested Salman in Hizbut Tahrir case : హైదరాబాద్లో హిజ్బుత్ తహ్రీర్ కార్యకలాపాలకు మహ్మద్ సలీం నేతృత్వం వహిస్తుండగా.. సల్మాన్ క్రియాశీలక పాత్ర పోషిస్తున్నట్లు ఎన్ఐఏ తేల్చింది. సలీం హైదరాబాద్ లో గతేడాది రహస్యంగా నిర్వహించిన సమావేశంలోనూ భోపాల్‌కు చెందిన ఇస్లామిక్ రాడికల్స్ హాజరైనట్లు ఎన్ఐఏ గుర్తించింది. హైదరాబాద్‌కు చెందిన హిజ్బుత్ తహ్రీర్ కార్యకర్తలను ఆరుగురిని ఇప్పటి వరకు అరెస్ట్ చేశారు. బృందానికి నేతృత్వం వహిస్తున్న మహ్మద్ సలీం ఓ వైద్య కళాశాలలో ఫార్మాష్యూటికల్ బయోటెక్నాలజీ విభాగాధిపతిగా పనిచేస్తున్నట్లు దర్యాప్తులో తేలింది. మహ్మద్ సలీం అసలు పేరు సౌరభ్ రాజ్ వైద్యగా పోలీసులు గుర్తించారు.
భార్యను మతమార్పిడి చేయించి..: భోపాల్‌కు చెందిన ఇతను 2010లో మతం మార్చుకున్నాడు. భార్యను సైతం మతమార్పిడి చేయించిన మహ్మద్ సలీం 2018లో హైదరాబాద్ వచ్చి గోల్కొండలో నివాసం ఉంటున్నట్లు తేల్చారు. ఒడిశాకు చెందిన దేవి ప్రసాద్ తన పేరును అబ్దుర్ రహమాన్‌గా మార్చుకున్నాడు. హఫీజ్ బాబా నగర్‌కు చెందిన వేణు కుమార్, మహ్మద్ అబ్బాస్ అలీగా మారాడు. గోల్కొండలోని బడా బజార్‌కు చెందిన దంత వైద్యుడు షేక్ జునైద్ సైతం ఈ బృందంలో సభ్యుడిగా తేల్చారు. హమీద్, సల్మాన్ ఇద్దరూ స్నేహితులని ఈ క్రమంలో ఇస్లామిక్ తీవ్రవాదం వైపు ఆకర్షితులైనట్లు కౌంటర్ ఇంటెలిజెన్స్ అధికారులు గుర్తించారు.
తీవ్రవాదం వైపు యువతను రెచ్చగొట్టి: మసీదుల్లో, ఇతర ప్రాంతాల్లో ఉండే యువతను తమ వైపు తిప్పుకునేలా ఈ ఆరుగురు ప్రణాళిక రచించినట్లు అధికారులు గుర్తించారు. ఐసిస్, ఆల్ ఖైదా, తాలిబన్లను ఆదర్శంగా తీసుకొని హిజ్బుత్ తహ్రీర్ కార్యకర్తలు దేశంలోనూ షరియా చట్టం అమలు చేసే విధంగా కుట్ర పన్నినట్లు ఎన్ఐఏ గుర్తించింది. ఇస్లామిక్ తీవ్రవాదం వైపు ముస్లిం యువతను రెచ్చగొట్టి.. ఆ తర్వాత వాళ్లందరికీ రహస్యంగా ఆయుధాల ఉపయోగం, బాంబుల తయారీ వంటి వాటిలో శిక్షణ ఇచ్చేలా నిందితులు కుట్ర పన్నినట్లు కేంద్ర నిఘా వర్గాలు పసిగట్టాయి.
అంతర్జాతీయ ఇస్లామిక్ రాడికల్స్ సంస్థ అయిన హిజ్బుత్ తహ్రీర్‌ను ఇప్పటికే పలు దేశాలు నిషేధించాయి. దేశంలో పాపులర్ ఫ్రంట్ ఆఫ్ ఇండియాను నిషేధించిన తర్వాత ఆ సంస్థ కార్యకర్తలు, అభిమానులను తిప్పుకునేలా హిజ్బుత్ తహ్రీర్ ప్రయత్నించినట్లు దర్యాప్తులో తేలింది. హిజ్బుత్ తహ్రీర్ పన్నిన కుట్రలన్నీ భగ్నం చేసే విధంగా దర్యాప్తు కొనసాగుతోందని జాతీయ దర్యాప్తు సంస్థ అధికారులు తెలిపారు.
ఇవీ చదవండి:
