ఆడ పిల్ల అని తెలిస్తే పుట్టుక ముందే ప్రాణాలు తీస్తున్న రోజులివి! అలాంటిది.. తమ కుటుంబంలో ఆడపిల్ల పుట్టిందని.. సంబరాలు చేసుకుంది రాజస్థాన్ నాగౌర్ జిల్లాకు చెందిన ఓ కుటుంబం.
35ఏళ్ల తర్వాత
జిల్లాలోని నింబ్డి చాందవతా గ్రామానికి చెందిన మదన్లాల్ కుమార్ కుటుంబంలో రెండు నెలల క్రితం ఆడపిల్ల జన్మించింది. ఆ కుటుంబంలో 35 ఏళ్ల తర్వాత ఆడపిల్ల పుట్టడం ఇదే తొలిసారి కావడం విశేషం. దీంతో ఆ కుటుంబం సంతోషంలో మునిగిపోయింది. ఆ చిన్నారిని రాకను ఓ వేడుకలా జరిపింది.
హెలికాప్టర్లో ఇంటి..
అమ్మమ్మవాళ్ల ఊరులో ఉన్న ఆ చిన్నారిని హెలికాప్టర్లో తీసుకురావాలని తాత మదన్లాల్ కుమార్ నిర్ణయించారు. ఇందుకు జిల్లా పాలనాధికారి నుంచి అనుమతి పొందారు. అనంతరం ఆ చిన్నారిని తీసుకురావడానికి గ్రామంలో భారీ ఏర్పాట్లు చేశారు. 30 కిలోమీటర్లు దూరంలో ఉన్న ఆమెను రూ.4.5 లక్షలు ఖర్చు చేసి హెలికాప్టర్లో తీసుకొచ్చారు. అప్పటికే ఊరులో బ్యాండ్ బాజాలతో సిద్ధంగా ఉన్న బంధుమిత్రులు.. ఆ పాపకు ఘన స్వాగతం పలికారు. రామనవమి శుభసందర్భంగా గ్రామంలో అడుగుపెట్టిన తల్లి, కుమార్తెపై పూలు జల్లుతూ.. ఇంటికి తీసుకెళ్లారు. ఆ చిన్నారి రాకను ఓ ఉత్సవంలా నిర్వహించారు.
"నా కుమార్తెను హెలికాప్టర్లో తీసుకొచ్చాను. ఆడపిల్ల పుట్టుకను ఓ పండుగలా జరపాలనే సందేశాన్ని ఇవ్వడానికే ఇలా చేశాను"
- హనుమాన్ రామ్ ప్రజాపత్, చిన్నారి తండ్రి
ఇదీ చూడండి: 8 రోజుల్లోనే కొవిడ్ ఆస్పత్రి నిర్మాణం
