కాలాపానీ వివాదం నేపథ్యంలో భారత్-నేపాల్ మధ్య సంబంధాలు కాస్త దెబ్బతిన్నాయి. ఆ తర్వాత వివాదం సద్దమణిగి.. ఇరు దేశాలు మళ్లీ దగ్గరయ్యే ప్రయత్నాలు చేస్తున్న క్రమంలో.. మరో షాకింగ్ విషయం తెరపైకి వచ్చింది. నేపాల్ నుంచి భారత్ స్నేహాన్ని కోరుకుంటుంటే.. ఆ దేశం మాత్రం ఉత్తరాఖండ్ సరిహద్దులోని ఇండియా భూభాగంపై కన్నేసినట్లు ఆ రాష్ట్ర అటవీశాఖ చెబుతోంది. గత 12 సంవత్సరాలుగా ఉత్తరాఖండ్ సరిహద్దులోని భారతదేశ భూమిని నేపాల్ ఆక్రమిస్తున్నట్లు ఆ రాష్ట్ర అటవీ శాఖ రాష్ట్ర ప్రభుత్వానికి నివేదిక పంపింది.
చంపావత్‌లోని సరిహద్దు ప్రాంతంలో ఇప్పటివరకు అటవీశాఖకు చెందిన 5 హెక్టార్ల భారత భూమిని నేపాల్ ఆక్రమించినట్లు ఉత్తరాఖండ్ అటవీశాఖ వెల్లడించింది. వాస్తవానికి ఈ విషయమై భారత ప్రభుత్వానికి నేపాల్, భూటాన్‌ సరిహద్దులో మోహరించిన భారతదేశ సరిహద్దు రక్షణ దళం సశాస్త్ర సీమా బాల్( ఎస్ఎస్బీ) నివేదించింది. తాజాగా ఉత్తరాఖండ్ ప్రభుత్వానికి.. ఆ రాష్ట్ర అటవీ శాఖ రాష్ట్ర నివేదిక అందజేసింది.
సరిహద్దులోని భారత భూభాగాన్ని నేపాల్ ఆక్రమిస్తుందని వార్తలు వచ్చిన నేపథ్యంలో అటవీశాఖ అలర్ట్ అయ్యింది. దీంతో విచారణ చేపట్టగా.. ఈ 5 హెక్టార్ల అటవీ భూమి ఆక్రమణకు గురైనట్లు తేలిందని ఆ నివేదికలో చెప్పుకొచ్చారు.
ఈ విషయంపై ఉత్తరాఖండ్ అటవీ శాఖ మంత్రి సుబోధ్ ఉనియాల్ స్పందించారు. 'ఈ విషయం 2010 నాటిదని.. ఎస్ఎస్బీ కూడా భారత ప్రభుత్వానికి లేఖ రాసింది. చంపావత్‌లోని పూర్ణగిరికి వచ్చిన భక్తులు.. నేపాల్లోని భైరవుడిని దర్శించుకోవడం ఆనవాయితీ. ఎంతో ప్రాశస్త్యం ఉన్న పూర్ణగిరి కోసమే.. నేపాల్ ఆక్రమణలకు పాల్పడి ఉండొచ్చు. ఈ సమస్యపై భారత ప్రభుత్వం నేపాల్ ప్రభుత్వంతో మాట్లాడుతోంది' అని చెప్పారు సుబోధ్.
ఇదీ చదవండి: మొండెం లేని యువకుడి మృతదేహం లభ్యం.. హత్యనా? లేక ఇంకేమైనా?
