NEET PG Exam: ఈడబ్ల్యూఎస్​ కోటాపై సుప్రీంకోర్టుకు కేంద్రం క్లారిటీ!

NEET PG Exam EWS Quota: నీట్​ పీజీ పరీక్షల్లో ఈ విద్యాసంవత్సరానికి సంబంధించి ఈడబ్ల్యూఎస్​ కోటాలో పేర్కొన్న వార్షిక ఆదాయ పరిమితిని రూ. 8 లక్షలుగానే ఉంచనున్నట్లు కేంద్రం సుప్రీం కోర్టుకు తెలిపింది. త్రిసభ్య కమిటీ సిఫార్సులను అంగీకరిస్తున్నట్లు అఫిడవిట్​లో స్పష్టం చేసింది.

NEET PG Exam EWS Quota: నీట్‌ పీజీ పరీక్షల్లో ఆర్థికంగా వెనుకబడిన వర్గాలకు(ఈడబ్ల్యూఎస్​) రిజర్వేషన్లు కల్పించిన విషయమై దాఖలైన పిటిషన్​ విచారణ జనవరి ఆరో తేదీన జరగాల్సి ఉంది. ఈ నేపథ్యంలో సుప్రీంకోర్టులో.. కేంద్రం అఫిడవిట్​ దాఖలు చేసింది. ఈ విద్యా సంవత్సరానికి ఈడబ్ల్యూఎస్‌ కోటాలో పేర్కొన్న వార్షిక ఆదాయ పరిమితిని రూ.8 లక్షలుగానే ఉంచనున్నట్లు స్పష్టం చేసింది. అడ్మిషన్లు, సీట్ల కేటాయింపు కొనసాగుతున్న ఈ సమయంలో నిబంధనల్ని మార్చడం వల్ల తీవ్ర పరిణామాలుంటాయని పేర్కొంది. వచ్చే సంవత్సరం సవరణలు చేస్తామని తెలిపింది.

ఈ వివాదంపై ఏర్పాటు చేసిన త్రిసభ్య కమిటీ చేసిన సిఫార్సులను అంగీకరిస్తున్నామని అఫిడవిట్‌లో కేంద్రం పేర్కొంది.

సుప్రీంకోర్టుకు ఇచ్చిన హామీ మేరకు.. గతేడాది నవంబర్​ 30న కేంద్ర ప్రభుత్వం త్రిసభ్య కమిటీని నియమించింది. మాజీ ఆర్థిక కార్యదర్శి అజయ్​ భూషణ్​ పాండే, ఐసీఎస్​ఎస్​ఆర్​ మెంబర్​ సెక్రటరీ వీకే మల్హోత్రా, కేంద్ర ప్రధాన ఆర్థిక సలహాదారు సంజీవ్​ సన్యాల్​ సభ్యులు. గతేడాది డిసెంబర్​ 31న కమిటీ తమ నివేదికను సమర్పించింది.

కమిటీ నివేదిక ప్రకారం..

• రిజర్వేషన్లు పొందడానికి వార్షిక ఆదాయ పరిమితి రూ.8 లక్షలుగా కొనసాగనుంది.
• ఐదు ఎకరాల కంటే ఎక్కువ వ్యవసాయ భూమి ఉన్న కుటుంబాలకు చెందిన విద్యార్థులకు మాత్రం ఈడబ్ల్యూఎస్‌ రిజర్వేషన్‌ వర్తించదు.
• ఈ సిఫార్సులు ప్రస్తుతం కొనసాగుతున్న అడ్మిషన్‌ ప్రక్రియను మాత్రం ప్రభావితం చేయబోవని కమిటీ స్పష్టం చేసింది.

కౌన్సెలింగ్​ ఆలస్యంపై సమ్మె..

NEET PG Counselling: నీట్​ పీజీ కౌన్సెలింగ్‌ ఆలస్యంపై ఇటీవల రెసిడెంట్​ డాక్టర్లు సమ్మె చేపట్టారు. 14 రోజుల అనంతరం విరమించారు.

తొలుత నవంబర్​ 27న నిరసనకు దిగారు. అనంతరం.. సుప్రీంకోర్టుకు ర్యాలీగా బయల్దేరాలని నిర్ణయించుకున్నారు. అప్పుడే డాక్టర్లు, పోలీసుల మధ్య ఘర్షణ చెలరేగింది. దిల్లీలోని ఓ ఆస్పత్రిలో వారిపై పోలీసులు అసభ్యంగా ప్రవర్తించారని ఆరోపిస్తూ సమ్మె బాట పట్టారు.

దిల్లీ పోలీస్​ కమిషనర్​తో సమావేశం అనంతరం డిసెంబర్​ 31న సమ్మె విరమిస్తూ నిర్ణయం తీసుకున్నారు. నిరసనలకు సంబంధించి వైద్యులపై ఎఫ్​ఐఆర్​ల ఉపసంహరణపై పోలీస్​ అధికారి హామీ ఇచ్చిన నేపథ్యంలో.. సమ్మెను ఆపారు.

నీట్​ పీజీ కౌన్సెలింగ్​ 2022 జనవరి 6లోపు ప్రారంభం అవుతుందని.. కేంద్ర ఆరోగ్య మంత్రి హామీ ఇచ్చినట్లు స్పష్టం చేశారు భారతీయ వైద్య సంఘం(ఐఎంఏ) అధ్యక్షుడు సహజానంద్​ ప్రసాద్​ సింగ్​. వైద్యులపై ఎలాంటి ఎఫ్​ఐఆర్​లు ఉండబోవని పేర్కొన్నారు.

ఇవీ చూడండి: Financial problems: నీట్‌ ఫలితాల్లో ఉత్తమ ర్యాంకు.. స్తోమత లేక ఇంటికే పరిమితం!