Coronavirus Update: భారత్లో ఒమిక్రాన్ ప్రభావంతో కరోనా మళ్లీ విజృంభిస్తోంది. ఆయా రాష్ట్రాల్లో వైరస్ తీవ్ర స్థాయిలో వ్యాప్తి చెందుతోంది.
- మహారాష్ట్రలో ఆదివారం.. 44 వేల 388 కరోనా కేసులు నమోదయ్యాయి. 12 మంది మరణించారు. ముంబయిలో కొత్తగా 19 వేల 474 కరోనా కేసులు వెలుగుచూశాయి. మరో ఏడుగురు చనిపోయారు. పుణెలో మరో 4 వేలమందికిపైగా వైరస్ బారినపడ్డారు.
- బంగాల్లో ఆదివారం 24 వేల 287 కొత్త కేసులు నమోదయ్యాయి. 18 మంది ప్రాణాలు కోల్పోయారు. ఇవాళ పాజిటివిటీ రేటు 33.89 శాతం కావడం గమనార్హం.
- దిల్లీలో ఒక్కరోజే 22 వేల 751 కేసులు వెలుగుచూశాయి. 17 మంది మరణించారు. ప్రస్తుతం 60 వేలకుపైగా యాక్టివ్ కేసులున్నాయి.
- తమిళనాడులో నేడు 12,895 మందికి వైరస్ సోకింది. 1808 మంది కోలుకోగా.. 12 మంది మరణించారు.
- కర్ణాటకలో కొద్దిరోజులుగా కేసులు భారీ స్థాయిలో పెరిగిపోతున్నాయి. ఆదివారం ఒక్కరోజే 12 వేల మందికి వైరస్ సోకింది. ఇందులో ఒక్క బెంగళూరు నగరంలోనే 9 వేలమందికిపైగా ఉండటం ఆందోళన కలిగిస్తోంది.
రాష్ట్రంలో పాజిటివిటీ రేటు 6.33 శాతానికి చేరినట్లు ఆరోగ్య మంత్రి కె. సుధాకర్ వెల్లడించారు. ప్రస్తుతం 49 వేలకుపైగా యాక్టివ్ కేసులున్నాయి.
- కేరళలో మరో 6238 కరోనా కేసులు నమోదయ్యాయి. 2390 మంది కోలుకోగా.. 30 మరణాలు సంభవించాయి.
- గుజరాత్లో 6,275 మంది ఇవాళ వైరస్ బారినపడ్డారు. రాష్ట్రంలో ఒమిక్రాన్ కేసులు 236కు చేరాయి.
- గోవాలో 1922 కొత్త కొవిడ్ కేసులు వెలుగుచూశాయి. పాజిటివిటీ రేటు 25 శాతానికి సమీపించింది.
ఆంక్షలు..
- UP Curfew: ఉత్తర్ప్రదేశ్లో రాత్రి కర్ఫ్యూ అమలు చేస్తున్నట్లు ప్రకటించారు ముఖ్యమంత్రి యోగి ఆదిత్య నాథ్. రాష్ట్రంలో విద్యా సంస్థలు కూడా జనవరి 16 వరకు ఆన్లైన్ క్లాస్లు మాత్రమే నిర్వహించాలని స్పష్టం చేశారు.
- ఆంక్షలు విధించినా రాష్ట్రంలో కేసులు పెరుగుతున్న నేపథ్యంలో.. మరిన్ని చర్యలకు సిద్ధమైంది మహారాష్ట్ర ప్రభుత్వం. ప్రార్థనా స్థలాలు, మద్యం దుకాణాలు, ప్రజలు గుమిగూడే అవకాశం ఉన్న ఇతర ప్రాంతాల్లో క్రమక్రమంగా కఠిన ఆంక్షలు విధించనున్నట్లు స్పష్టం చేసింది.
- కరోనా కేసులు పెరుగుతున్న నేపథ్యంలో హిమాచల్ ప్రదేశ్.. కఠిన ఆంక్షలు విధించింది.
* ప్రభుత్వ కార్యాలయాలను వారంలో ఐదు రోజులు మాత్రమే తెరవనున్నట్లు, 50 శాతం సిబ్బందితోనే నడపనున్నట్లు ప్రకటించింది.
* నైట్ కర్ఫ్యూ అమలు.
* జనవరి 26 వరకు విద్యాసంస్థల బంద్.
* ఇండోర్లో 100, బహిరంగ ప్రదేశాల్లో 300 మందికి మించకుండా.. రాజకీయ, క్రీడా, సాంస్కృతిక కార్యక్రమాల నిర్వహణకు అనుమతి.
* అత్యవసర సేవల విభాగాలకు ఆంక్షల నుంచి మినహాయింపు.
- Tamilnadu Lockdown: తమిళనాడులో ఆదివారం లాక్డౌన్ అమల్లో ఉంది. ప్రజల రాకపోకలపై ఆంక్షలు విధించగా.. చెన్నైలోని ప్రధాన రహదారులు నిర్మానుష్యంగా మారాయి.
- త్రిపురలో జనవరి 10- 20 మధ్యలో రాత్రి కర్ఫ్యూ విధిస్తున్నట్లు ప్రకటించింది ప్రభుత్వం. సినిమా హాళ్లు, క్రీడా ప్రాంగణాలు, వినోద పార్కులు, బార్లకు.. 50 శాతం సామర్థ్యంతో కార్యకలాపాలు సాగించేందుకు అనుమతి ఇచ్చింది.
- Puri Jagannath Temple: ఒడిశాలో ప్రసిద్ధి చెందిన పూరీ జగన్నాథ్ ఆలయంలో.. దైవ దర్శనంపై ఆంక్షలు విధించింది ప్రభుత్వం. జనవరి 31 వరకు ఈ నిర్ణయం అమల్లో ఉండనున్నట్లు పేర్కొంది.జనవరి 31వరకు పూరీ జగన్నాథ్ ఆలయంలో దర్శనాలు బంద్
- ఇండిగో ఎయిర్లైన్స్పై ఒమిక్రాన్ ఎఫెక్ట్ పడింది. కేసులు పెరుగుతున్న నేపథ్యంలో.. దాదాపు 20 శాతం విమానాలను రద్దు చేస్తున్నట్లు ప్రకటించింది.
- Supreme Court Corona: సుప్రీంకోర్టులో కరోనా కలకలం రేపింది. అత్యున్నత న్యాయస్థానంలోని.. నలుగురు న్యాయమూర్తులు, దాదాపు ఐదు శాతం సిబ్బంది (150 మంది) కొవిడ్ బారినపడ్డారు.
- పంజాబ్ చీఫ్ ఎలక్ట్రోరల్ ఆఫీసర్ డా. కె. కరుణా రాజుకు కరోనా సోకింది. రాష్ట్రంలో అసెంబ్లీ ఎన్నికల షెడ్యూల్ విడుదలైన మరుసటి రోజే ఆయనకు పాజిటివ్గా నిర్ధరణ అయింది.
- యూపీ పీలీబీత్ లోక్సభ ఎంపీ, భాజపా నేత వరుణ్ గాంధీ కరోనా బారినపడ్డారు. తనకు తీవ్రమైన కరోనా లక్షణాలు ఉన్నట్లు ట్విట్టర్లో పేర్కొన్నారు.
ఈ నేపథ్యంలోనే ఎన్నికల్లో పోటీ చేసే అభ్యర్థులు, రాజకీయ కార్యకర్తలకు కూడా ప్రికాషన్ డోసు( వ్యాక్సిన్ మూడో డోసు) అందేలా చూడాలని ఈసీకి విజ్ఞప్తి చేశారు వరుణ్ గాంధీ.
ఐదు రాష్ట్రాల అసెంబ్లీ ఎన్నికలకు సంబంధించి ఎన్నికల సంఘం శనివారం.. షెడ్యూల్ విడుదల చేసింది. ఫిబ్రవరి 10- మార్చి 7 మధ్య పోలింగ్ జరగనుండగా.. మార్చి 10న ఫలితాలు ప్రకటించనున్నారు.
ఉత్తర్ప్రదేశ్లో అత్యధికంగా ఏడు దశల్లో ఎన్నికలు జరగనున్నాయి.
India Corona cases: దేశంలో రోజువారీ కొవిడ్ కేసులు భారీగా నమోదవుతున్నాయి. శనివారం ఉదయం నుంచి ఆదివారం ఉదయం వరకు 1,59,632 మంది వైరస్ బారిన పడ్డారు. కరోనా వల్ల మరో 327మంది మృతి చెందారు. 40,863 మంది వైరస్ నుంచి కోలుకున్నారు. కొవిడ్ విపరీతంగా పెరుగుతున్న నేపథ్యంలో దేశంలో రోజువారీ పాజిటివిటీ రేటు 10.21 శాతానికి పెరిగినట్లు కేంద్ర ఆరోగ్య శాఖ తెలిపింది.
ఇవీ చూడండి: ప్రధాని మోదీ కీలక ప్రకటన- ఇకపై ఏటా డిసెంబర్ 26న..
