Mother killed Children: రాజస్థాన్ చిత్తోర్గఢ్లో దారుణం జరిగింది. కపాసన్ పోలీస్ స్టేషన్ పరిధిలో ఓ మహిళ తన ముగ్గురు పిల్లలను ఉరి తీసి చంపింది. ఆ తర్వాత తాను ఉరి వేసుకుని ఆత్మహత్యకు పాల్పడింది. బుధవారం రాత్రి ఈ ఘటన జరిగింది. అయితే మహిళ పిల్లలను ఎందుకు చంపి ఉంటుందనే విషయం తెలియాల్సి ఉంది. పోలీసులు మాత్రం కుటుంబ తగాదాల వల్లే మహిళ ఈ చర్యకు పాల్పడి ఉంటుందని అనుమానిస్తున్నారు.
కపాసన్ సీఐ ఫూల్చంద్ టేలర్ చెప్పిన వివరాల ప్రకారం.. ఆర్ఎన్టీ కోళ్ల ఫాంలో మృతురాలు రూప, ఆమె భర్త భూరాలాల్ ఏడేళ్లుగా పనిచేస్తున్నారు. బుధవారం అతను పని మీద బయటకు వెళ్లాడు. రాత్రి అయ్యాక తిరిగి వచ్చి చూస్తే భార్య, ముగ్గురు పిల్లలు తలో దిక్కు ఉరివేసుకుని విగతజీవులుగా కనిపించారు. వెంటనే భూరాలాల్ తన యజమానికి ఫోన్ చేసి విషయం చెప్పాడు. ఆ తర్వాత యజమాని పోలీసులకు సమాచారం అందించాడు. వారు వచ్చి ఘటనా స్థలం నుంచి క్లూస్ టీం సాయంతో ఆధారాలు సేకరించారు. భార్యాభర్తలు రత్లాంకు చెందిన వారని, పనికోసం వచ్చి కపాసన్లో నివసిస్తున్నట్లు పోలీసులు చెప్పారు.
ఈ ఘటనలో చనిపోయిన ముగ్గురు చిన్నారుల పేర్లు శివాని(7), రితేశ్(5), కిరణ్(3). తల్లి వీరిని ఎందుకు చంపి ఉంటుందనే విషయం అంతుపట్టడం లేదు. పోలీసులు తల్లీబిడ్డల మృతదేహాలను పోస్టుమార్టంకు తరలించారు. అన్ని కోణాల్లోనూ కేసు దర్యాప్తు చేస్తున్నామని డీఎస్పీ గీతా చౌదరి తెలిపారు. మృతురాలి కుటుంబసభ్యులకు సమాచారం అందించామని, వారిని కూడా వివరాలు అడిగి తెలుసుకుంటామన్నారు.
కేరళలో..: కేరళలో గురువారం ఓ వ్యక్తి భార్య, ఇద్దరు పిల్లలను గూడ్స్ ఆటోలో ఎక్కించి ఆ తర్వాత నిప్పంటించాడు. అనంతరం తానూ ఒంటికి నిప్పంటించుకుని బావిలో దూకి ఆత్మహత్య చేసుకున్నాడు. ఈ ఘటనలో భార్య, భర్తతో పాటు వారి 11 ఏళ్ల కుతురు చనిపోయింది. మరో ఐదేళ్ల కుమార్తె కాలిన గాయాలతో ఆస్పత్రిలో మృత్యువుతో పోరాడుతోంది. అయితే భర్త పోక్సో కేసులో నిందితుడని, ఈ ఘటనకు అదేమైనా కారణమై ఉంటుందా అని పోలీసులు అనుమానిస్తున్నారు.
ఇదీ చదవండి: 'ఆదిలాబాద్కు భారీగా ఆయుధాలు.. పాక్ కుట్ర భగ్నం.. నలుగురు అరెస్ట్'
