బెంగళూరులోని ఓ ఇంట్లో అనుమానాస్పద రీతిలో తల్లీకొడుకు మృతి చెందారు. వారి మృతదేహాలతో మూడు రోజులుగా ఇంట్లోనే ఉండిపోయింది మతిస్థిమితం లేని కూతురు. ఆ ఇంట్లోంచి దుర్వాసన రావడం వల్ల.. ఇంటి పక్కన ఉండే ఓ వ్యక్తి గమనించి.. పోలీసులకు సమాచారం అందించారు.
ఏం జరిగిందంటే?
హరీశ్ అనే వ్యక్తి.. బెంగళూరులోని ఓ ప్రైవేట్ కంపెనీలో పనిచేస్తున్నారు. అతడితో పాటు తల్లి ఆర్యాంబ, సోదరి శ్రీలక్ష్మి ఓ అద్దె ఇంట్లో నివసిస్తున్నారు. ఇటీవల కొవిడ్ బారినపడిన హరీశ్.. హోంక్వారంటైన్లో ఉన్నాడు. తల్లి, సోదరికి కూడా కరోనా సోకిందా అనే విషయంపై క్లారిటీ లేదు. అయితే.. వారు ఒత్తిడికి లోనైనట్లు తెలుస్తోంది. హరీశ్ ఆరోగ్య పరిస్థితి విషమించినందున.. రెండు మూడు రోజుల నుంచి అంబులెన్స్ కోసం పలుమార్లు ఫోన్ చేసినా ఫలితం లేకపోయింది. దీంతో అతడు చివరకు చనిపోయినట్టు తెలుస్తోంది. కొడుకు మృతిని జీర్ణించుకోలేక తల్లి కూడా అక్కడిక్కడే ప్రాణాలు కోల్పోయినట్టు అనుమానిస్తున్నారు పోలీసులు.
ఈ ఘటన జరిగిన మూడు రోజుల తర్వాత ఆ ఇంటి యజమాని ప్రవీణ్ గుర్తించాడు. బాధిత ఇంట్లో నుంచి దుర్వాసన వస్తుండటం గమనించి.. ఆర్.ఆర్.సిటీ పోలీసులకు ఫిర్యాదు చేశాడు. ఘటనా స్థలానికి చేరుకున్న పోలీసులు.. తలుపులు బద్దలుకొట్టి ఇంట్లోకి ప్రవేశించగా.. విగత జీవులుగా పడిఉన్న హరీశ్, ఆర్యాంబల మృతదేహాలు కంటపడ్డాయి. ఆ సమయంలో వారి పక్కనే.. శ్రీలక్ష్మి అపస్మారక స్థితిలో ఉన్నట్టు తెలిపారు పోలీసులు. మూడు రోజులుగా ఆమె ఆ శవాల వద్దే ఉన్నట్టు తెలుస్తోంది.
పోలీసులు కేసు నమోదు చేసుకుని దర్యాప్తు చేపట్టారు.
ఇదీ చదవండి: కంటతడి పెట్టిస్తున్న గర్భిణీ వైద్యురాలి 'చివరి సందేశం'
