ఉత్తర్ప్రదేశ్లో 'లవ్ జిహాద్' ఆర్డినెన్సుపై పునరాలోచించాలని బహుజన్ సమాజ్ పార్టీ(బీఎస్పీ) మాయావతి ఆ రాష్ట్ర సర్కారును కోరారు. ఈ ఆర్డినెన్స్లో పలు సందేహాలు, భయాలు ఉన్నాయని ఆమె పేర్కొన్నారు. ఈ చట్టం అమలైన మరుసటి రోజే బరేలీ జిల్లాలో ఓ కేసు వెలుగు చూసిన నేపథ్యంలో ట్విట్టర్ వేదికగా ఆమె స్పందించారు.
"యోగి సర్కార్ తొందరపాటు చర్యలతో తీసుకొచ్చిన లవ్ జిహాద్ ఆర్డినెన్స్.. సందేహాలు, భయాలతో కూడుకుని ఉంది. దేశంలో బలవంతపు మతమార్పిడి చేసేందుకు ఎలాంటి ఆధారాలూ లేవు. ఈ విషయంలో ఇప్పటికే అనేక చట్టాలు ఉన్నాయి. కాబట్టి ప్రభుత్వం దీనిపై మరోసారి ఆలోచించాల్సిన అవసరముంది."
- మాయావతి, బీఎస్పీ అధినేత్రి
సమాజ్వాద్ పార్టీ అధ్యక్షుడు అఖిలేశ్ యాదవ్ ఇప్పటికే ఈ ఆర్డినెన్సును వ్యతిరేకించారు.
ఏమిటీ ఆర్డినెన్స్?
బలవంతపు మత మార్పిళ్లకు వ్యతిరేకంగా యోగి ఆదిత్యనాథ్ నేతృత్వంలోని రాష్ట్ర కేబినెట్ ఇటీవలే ఈ ఆర్డినెన్సును ఆమోదించింది. దీని ప్రకారం బలవంతంగా మత మార్పిడికి పాల్పడినవారికి పదేళ్ల వరకు జైలుశిక్ష, గరిష్ఠంగా రూ. 50వేల వరకు జరిమానా విధించే అవకాశముంది.
ఇదీ చదవండి: మైనర్ను రేప్ చేసి.. గొంతుకోసి.. ఆపై బావిలో పడేసి..
