ఈ ఏడాది మార్చిలో ఉష్ణోగ్రతలు చాలా అధికంగా నమోదయ్యాయి. గత 121 ఏళ్ల మార్చి నెల ఉష్ణోగ్రతలను పరిశీలిస్తే.. 2021 ఎక్కువ వేడి ఉన్న మూడో ఏడాదిగా తేలింది. ఈ మార్చిలో కనిష్ఠ ఉష్ణోగ్రతలు సాధారణం కన్నా ఎక్కువగా నమోదయ్యాయని భారత వాతావరణ విభాగం(ఐఎండీ) తెలిపింది. గత నెలలో కనిష్ఠ ఉష్ణోగ్రత 19.95 డిగ్రీల సెల్సియస్, గరిష్ఠంగా 32.65, సగటు ఉష్ణోగ్రత 26.30 ఉన్నట్లు వివరించింది.
గతంలో 2010 మార్చిలో 33.09 డిగ్రీల సెల్సియస్తో అగ్రస్థానంలో ఉండగా.. 32.82 ఉష్ణోగ్రతతో 2004 రెండో స్థానంలో నిలిచిందని ఐఎండీ వెల్లడించింది.
కొన్ని ప్రాంతాల్లో గత మార్చిలో ఉష్ణోగ్రతలు 40 డిగ్రీలు దాటిపోయాయి. ఒడిశాలోని బారిపదాలో అత్యధికంగా 44.6 డిగ్రీల సెల్సియస్ ఉష్ణోగ్రతలు నమోదయ్యాయి. జనవరి, ఫిబ్రవరిల్లోనూ సాధారణం కన్నా ఎక్కువ ఉష్ణోగ్రతలు నమోదైనట్లు ఐఎండీ తెలిపింది.
ఉత్తరాదిన భారీ వర్షాలు..
ఉత్తర భారత్లో కొండ, మైదాన ప్రాంతాల్లో ఏప్రిల్ 5 నుంచి 9 తేదీల మధ్య భారీ వర్షాలు కురిసే అవకాశముందని ఐఎండీ సోమవారం తెలిపింది. జమ్ముకశ్మీర్, లద్దాఖ్, గిల్గిత్ బాల్టిస్థాన్, ముజఫరాబాద్ సహా హిమాచల్ప్రదేశ్ వ్యాప్తంగా 5-7 తేదీల్లో భారీ వర్షాలు కురుస్తాయని అంచనా వేసింది. ఉత్తరాఖండ్లో 6-7 తేదీల మధ్య వర్షాలు పడనున్నాయని వెల్లడించింది. పంజాబ్, హరియాణా, ఉత్తర్ప్రదేశ్ రాష్ట్రాల్లో ఈ నెల 5-7 తేదీల వరకు మోస్తారు వర్షాలు కురుస్తాయని ఐఎండీ తెలిపింది.
అలాగే రాజస్థాన్కు నైరుతి ప్రాంతాల్లో రానున్న 24 గంటలు, తూర్పు రాజస్థాన్లో రెండు రోజులు, విదర్భాలో మూడు రోజులు.. మధ్యప్రదేశ్ వ్యాప్తంగా ఈ నెల 7-9 వరకు వడగాలులు వీచే ప్రమాదం ఉందని హెచ్చరించింది.
ఇదీ చూడండి: సిక్కింలో భూకంపం- 5.4 తీవ్రత నమోదు
