LS Mobile App: లోక్సభ సమావేశాల ప్రత్యక్షప్రసారాన్ని వీక్షించేందుకు వీలుగా రూపొందించిన ప్రత్యేక యాప్ను స్పీకర్ ఓం బిర్లా మంగళవారం ప్రారంభించారు. ప్రశ్నోత్తరాల సమయంలో ఈ 'ఎల్ఎస్ మెంబర్ యాప్'ను ప్రవేశపెట్టిన స్పీకర్.. సభ్యులు యాప్ను డౌన్లోడ్ చేసుకోవడం సహా వారి నియోజకవర్గ ప్రజలు కూడా వినియోగించుకునేలా కృషి చేయాలని కోరారు.
"పార్లమెంటు సమావేశాలను యూజర్లు లైవ్లో వీక్షించేందుకు వీలుగా ఈ యాప్ను రూపొందించారు. ప్రశ్నోత్తరాలు, డిబెట్లు, బులెటిన్లు సహా సభ్యుల వివరాలు కూడా తెలుసుకోవచ్చు. పార్లమెంటుకు సంబంధించిన ముఖ్య పత్రాలు, వివిధ కమిటీల రిపోర్ట్లను చూడొచ్చు."
-ఓం బిర్లా, లోక్సభ స్పీకర్
సభలో గందరగోళం మధ్యే ఈ యాప్ను ప్రవేశపెట్టారు ఓం బిర్లా. కాంగ్రెస్, డీఎంకే, తృణమూల్తో పాటు వివిధ ప్రతిపక్ష పార్టీలు.. లఖీంపుర్ ఖేరీ ఘటన సహా పలు అంశాలపై ప్లకార్డులతో నిరసన తెలిపాయి. కేంద్ర మంత్రి అజయ్ మిశ్రను పదవి నుంచి తొలగించాలంటూ పలు పార్టీలు నిరసన తెలపగా.. కర్ణాటకలో ఛత్రపతి శివాజీ విగ్రహం అపవిత్రం చేసిన వారిపై కఠిన చర్యలు చేపట్టాలంటూ శివసేన డిమాండ్ చేసింది.
మరోవైపు డీఎంకే నేతలు కూడా ప్లకార్డులతో నిరసన తెలిపారు. నీట్ పరీక్షల నుంచి తమిళనాడుకు మినహాయింపు ఇవ్వాలని డిమాండ్ చేశారు.
ఇదీ చూడండి : 'మహిళల వివాహ వయస్సు పెంపు.. వారికి నచ్చట్లేదు'
