Konica Layak death: జాతీయ స్థాయి షూటర్ కోనికా లాయక్.. అనుమానాస్పద రీతిలో మరణించారు. శిక్షణ కోసం ప్రస్తుతం కోల్కతాలో ఉంటున్న కోనికా.. తాను నివసిస్తున్న ప్రదేశంలో విగతజీవిగా కనిపించారు.
కోనికాకు ఆరోగ్యం బాగాలేదని ఝార్ఖండ్లోని ధన్బాద్లో ఉండే ఆమె తల్లికి సమాచారం అందింది. చివరకు కోల్కతా చేరుకునేసరికి కోనికా ఆస్పత్రిలో మరణించి ఉందని కుటుంబ సభ్యులు తెలిపారు. పోస్టుమార్టం నివేదిక వచ్చిన తర్వాతే మరణానికి కారణాలు తెలుస్తాయని అధికారులు చెప్పారు.
కోనికకు ఇదివరకే పెళ్లి నిశ్చయమైంది. ఫిబ్రవరిలో వివాహం జరగాల్సి ఉంది. ఇంట్లో ఏర్పాట్లు కూడా మొదలయ్యాయి. ఈ తరుణంలో ఆమె మరణించడం కుటుంబ సభ్యులను షాక్కు గురిచేసింది. తమ సర్వస్వం కోల్పోయామని తల్లిదండ్రులు కన్నీరుమున్నీరవుతున్నారు.
Konika Layak Sonu Sood
2014లో షూటింగ్ కెరీర్ను ప్రారంభించారు కోనిక. ఝార్ఖండ్లోని బాస్తకోలాలో శిక్షణ మొదలుపెట్టారు. మధ్యతరగతి నుంచి వచ్చిన కోనిక.. తొలినాళ్లలో తన స్నేహితుల రైఫిల్తో షూటింగ్ నేర్చుకున్నారు. ఈక్రమంలోనే జాతీయ స్థాయి పోటీలకు ఎంపికయ్యారు. ఈ పోటీలలో పాల్గొనేందుకు సరైన రైఫిల్ లేక ఇబ్బందులు పడుతుంటే.. ఈటీవీ భారత్ ఆమె అవస్థలను వెలుగులోకి తెచ్చింది. ఈ క్రమంలో కోనిక గురించి తెలుసుకున్న సినీ నటుడు సోనూసూద్ ఆమెకు అండగా నిలిచారు. జర్మన్ రైఫిల్ కొనిచ్చి.. ఆమె కలలు నెరవేర్చుకునేందుకు సహకరించారు.
ఇదీ చదవండి: రైల్వే ప్లాట్ఫామ్పై కరెన్సీ నోట్లు.. యాచకుడి విచిత్ర ప్రవర్తన
