ఆర్​టీసీల మధ్య వివాదం- ఆ రాష్ట్రానిదే విజయం

రెండు రాష్ట్రాల ఆర్​టీసీ వివాదంలో.. కేరళనే విజయం సాధించింది. రోడ్డు రవాణా సంస్థ సంక్షిప్తనామం- కేఎస్​ఆర్​టీసీ పేరు, లోగోను కర్ణాటక వాడేందుకు వీలు లేదని తీర్పు వెలువడింది.

కర్ణాటక, కేరళ మధ్య ఏళ్లుగా సాగుతోన్న ఆర్​టీసీ వివాదం ఓ కొలిక్కి వచ్చింది. ఏడేళ్ల సుదీర్ఘ న్యాయపోరాటంలో కేరళనే విజయం వరించింది. రాష్ట్ర రోడ్డు రవాణా సంస్థ సంక్షిప్తనామం - కేఎస్​ఆర్​టీసీని వాడుకునేందుకు కేరళకే హక్కు ఉందని స్పష్టం చేసింది ట్రేడ్​మార్క్​ రిజిస్ట్రీ. 1999- ట్రేడ్​మార్క్స్​ చట్టం ప్రకారం.. ఇప్పుడు కేఎస్​ఆర్​టీసీ పేరు, లోగో.. కేరళకు మాత్రమే చెందుతాయని వెల్లడించింది.

ఈ వ్యవహారంలో కేరళపై 2014లో ఫిర్యాదు చేసింది కర్ణాటక. ట్రేడ్​మార్క్​ రిజిస్ట్రీ ప్రకారం.. తామే మొదట కేఎస్​ఆర్​టీసీ పేరును ఉపయోగించినట్లు నిరూపించింది కేరళ ప్రభుత్వం. దీనికి అనుగుణంగానే.. ఆ రాష్ట్రానికి అనుకూలంగా తీర్పు వెలువడింది.

ఇప్పటినుంచి తమ పేరును వాడొద్దని.. త్వరలో కర్ణాటక రోడ్డు రవాణా సంస్థకు సమాచారం అందించనున్నట్లు తెలిపారు కేఎస్​ఆర్​టీసీ ఎండీ బిజు ప్రభాకర్​. దీనిని ఉల్లంఘిస్తే.. చట్టపరమైన చర్యలు తీసుకుంటామని హెచ్చరించారు.