భారీగా ఆస్తులు ఉన్నా, తెల్ల రేషన్ కార్డ్ కలిగి ఉన్న నగర పాలక సంస్థ కౌన్సిలర్ ఎన్నిక చెల్లదని ప్రకటించింది కర్ణాటకలోని ఓ కోర్టు. ఎన్నికల అఫిడవిట్లో వాస్తవాల్ని దాచిపెట్టారని నిర్ధరిస్తూ తుమకూరు జిల్లా సిరాలోని న్యాయస్థానం ఈ మేరకు తీర్పు ఇచ్చింది. ఫలితంగా జేడీఎస్ కౌన్సిలర్ రవి శంకర్ పదవి కోల్పోయారు.
ఇదీ జరిగింది..: సిరా నగర పాలక సంస్థకు 2021 డిసెంబర్ 30న ఎన్నికలు జరిగాయి. 9వ వార్డుకు జేడీఎస్ తరఫున రవి శంకర్, కాంగ్రెస్ టికెట్పై కృష్ణప్ప పోటీపడ్డారు. రవి శంకర్ విజయం సాధించారు. అయితే.. ఆయన ఎన్నికను సవాలు చేస్తూ కోర్టులో పిటిషన్ వేశారు కృష్ణప్ప. ఓ క్రిమినల్ కేసులో దోషిగా తేలిన విషయాన్ని ఎన్నికల అఫిడవిట్లో పేర్కొనలేదని వాదించారు. 500 కిలోల బంగారం ఉందని, అద్దెల ద్వారా రూ.3.6లక్షల ఆదాయం వస్తోందని అఫిడవిట్లో చెప్పినా.. రవి శంకర్ పేదలకు ఇచ్చే బీపీఎల్ రేషన్ కార్డ్ కలిగి ఉన్నారని కోర్టు దృష్టికి తీసుకెళ్లారు కృష్ణప్ప.
ఈ ఆరోపణలపై వివరణ ఇస్తూ కౌంటర్ దాఖలు చేశారు రవి శంకర్. క్రిమినల్ కేసు గురించి అఫిడవిట్లో ప్రస్తావించడం మర్చిపోయానని కోర్టుకు నివేదించారు. తన దగ్గర 499.5కిలోల వెండి, 500 గ్రాముల బంగారం ఉందని.. అయితే అఫిడవిట్లో రెండూ కలిపి 500 కిలోల ఆభరణాలు ఉన్నాయని పేర్కొన్నానని వివరించారు. కానీ.. కోర్టు విట్నెస్ బాక్స్లో ఈ విషయాలు చెప్పలేదు రవి శంకర్. లిఖితపూర్వక సమాధానంతో సరిపెట్టారు.
చివరకు.. రవి శంకర్ వాస్తవాల్ని దాచిపెట్టారని న్యాయస్థానం నిర్ధరించింది. ఇలా చేయడం రాజ్యాంగ నిబంధనలు, సుప్రీంకోర్టు ఆదేశాలను ఉల్లంఘించడమేనని అభిప్రాయపడింది. విట్నెస్ బాక్స్లోకి వచ్చి పిటిషనర్ వాదనల్ని తిప్పికొట్టకపోవడాన్నీ తప్పుబట్టింది. సిరా నగర పాలక సంస్థ 9వ వార్డు కౌన్సిలర్గా ఆయన ఎన్నిక చెల్లదని ఆగస్టు 26న తీర్పు ఇచ్చింది.
ఇవీ చదవండి: 'రూ.41వేల టీషర్ట్ వేసుకుని పాదయాత్ర'.. రాహుల్పై భాజపా సెటైర్
ఆరు నెలల చిన్నారికి పూజలు.. దర్శనం కోసం వందలాది మంది క్యూ.. ఆ మచ్చలే కారణం
