జమ్ముకశ్మీర్లోని వైమానిక స్థావరంపై డ్రోన్ల దాడి(Drone attack) తర్వాత పలుమార్లు సరిహద్దుల్లో డ్రోన్లు కలకలం సృష్టించాయి. ఈ నేపథ్యంలో జమ్ము కశ్మీర్(Jammu and Kashmir) అధికార యంత్రాంగం కీలక నిర్ణయం తీసుకుంది. శ్రీనగర్లో డ్రోన్లు బ్యాన్ చేస్తున్నట్లు ప్రకటించింది.
ఈమేరకు జిల్లా కలెక్టర్ మహమ్మద్ ఎజాజ్.. శ్రీనగర్లో డ్రోన్ సంబంధిత కార్యకలాపాలు జరిపితే కఠిన చర్యలను తీసుకోవాలని పోలీసులను ఆదేశించారు. డ్రోన్ సరఫరా, అమ్మకం మొదలైన వాటిపై పూర్తిగా నిషేధం విధిస్తున్నట్లు స్పష్టం చేశారు.
ఇదీ చదవండి:సరిహద్దులో మరోసారి డ్రోన్ల కలకలం
జిల్లా పరిధిలో జరిగే సామాజిక, సాంస్కృతిక కార్యకలాపాల్లో డ్రోన్ల వాడకం తప్పనిసరిగా నిలిపివేయాలని ఎజాజ్ తెలిపారు. సరిహద్దుల్లో వైమానిక స్థావరం భద్రత దృష్ట్యా ఈ నిర్ణయం తీసుకున్నట్లు వెల్లడించారు.
డ్రోన్ సంబంధిత వస్తువులు ఉన్నవారు.. స్థానిక పోలీసు స్టేషన్లలో వాటిని పొందుపరచాలని పేర్కొన్నారు. ప్రభుత్వ కార్యాచరణకు డ్రోన్లను వినియోగించాలన్నా పోలీసుల అనుమతి తప్పనిసరిగా తీసుకోవాలని తెలిపారు.
ఇదీ చదవండి:డ్రోన్ల ముప్పుపై ఆర్మీ చీఫ్ కీలక వ్యాఖ్యలు
ఈ నెల 27న జమ్మూలోని భారత వైమానిక దళ స్థావరంపై డ్రోన్ దాడి జరిగింది. ఆ తర్వాత వరుసగా జమ్ములోని మూడు ప్రాంతాల్లో డ్రోన్ల సంచారం కలకలం రేపింది. భారత్‌కు చెందిన కీలక స్థావరాలపై డ్రోన్ల ద్వారా పాకిస్థాన్‌ దాడులకు పాల్పడుతున్నట్లు నిఘా వర్గాలు అనుమానం వ్యక్తం చేశాయి.
ఇదీ చదవండి:Jammu IAF Station: డ్రోన్ కౌంటర్‌ వ్యవస్థ ఏర్పాటు
