దాణా కుంభకోణం కేసులో బెయిల్ దక్కించుకున్న ఆర్జేడీ అధ్యక్షుడు లాలూ ప్రసాద్.. సోమవారం విడదలయ్యే అవకాశం ఉన్నప్పటికీ.. ఆయన మరికొన్ని రోజుల తర్వాతే ఇంటికి వెళ్లనున్నట్లు తెలుస్తోంది. అనారోగ్యంతో బాధపడుతున్న ఆయన పూర్తిగా కోలుకున్న తర్వాతే ఇంటికి వస్తారని లాలూ కుటుంబం తెలిపింది.
లాలూ ప్రసాద్ యాదవ్ త్వరగా కోలుకోవాలని ఆయన కుమారుడు, ఆర్జేడీ నేత తేజస్వీ యాదవ్ ఆకాంక్షించారు. దిల్లీలోని ఎయిమ్స్లోనే ఆయనకు చికిత్స కొనసాగుతుందని స్పష్టం చేశారు.
దుమ్కా ట్రెజరీ నుంచి అక్రమంగా రూ.3.13 కోట్లను విత్డ్రా చేశారన్న ఆరోపణలతో నమోదైన ఈ కేసులో లాలూకు బెయిల్ మంజూరు చేస్తూ శనివారం.. ఝార్ఖండ్ హైకోర్టు ఉత్తర్వులు ఇచ్చింది. రాంచీ జైలులో ఉన్న ఆయన ఆరోగ్య పరిస్థితి క్షీణించగా.. గత జనవరిలో విమానం ద్వారా దిల్లీలోని ఎయిమ్స్కు పంపించారు. తిహాడ్ జైలు అధికారుల పర్యవేక్షణలో ప్రస్తుతం ఆయన ఎయిమ్స్లోనే ఉన్నారు. లాలూ విడుదల నిమిత్తం హైకోర్టు ఉత్తర్వులను సోమవారం రాంచీలోని సీబీఐ ప్రత్యేక కోర్టుకు చూపించనున్నారు. ఆ కోర్టు ఇచ్చే ఆదేశాలను రాంచీ జైలు, తిహార్ జైలు అధికారులకు ఇస్తారు. ఆ తరువాతే.. లాలూ విడుదలకు అవకాశం కలుగుతుంది.
ఇదీ చూడండి: వారణాసిలో కొవిడ్ పరిస్థితులపై మోదీ సమీక్ష
