దేశంలోని తొలి కరోనా రోగికి మరోసారి పాజిటివ్

దేశంలోని తొలి కరోనా రోగికి మరోసారి వైరస్​ సోకింది. ఈ విషయాన్ని అధికారులు మంగళవారం వెల్లడించారు. గతేడాది జనవరిలో చైనా నుంచి సెలవుల నిమిత్తం భారత్​కు వచ్చిన విద్యార్థినికి పరీక్షలు నిర్వహించగా కరోనా సోకినట్లు తేలింది.

దేశంలో కరోనా సోకిన తొలి వ్యక్తి మరోసారి మహమ్మారి బారిన పడ్డారు. కేరళ త్రిస్సూర్​కు చెందిన ఓ వైద్య విద్యార్థినికి కరోనా పరీక్షలు నిర్వహించగా పాజిటివ్​ అని తేలింది. ఈ విషయాన్ని అధికారులు మంగళవారం వెల్లడించారు. అయితే ఆమెలో ఎలాంటి లక్షణాలను గుర్తించలేదని పేర్కొన్నారు.

చదువు రీత్యా ఆమె దిల్లీ వెళ్తున్న నేపథ్యంలో కరోనా పరీక్షలు నిర్వహించగా వైరస్​ సోకినట్లు తేలింది. ప్రస్తుతం బాధితురాలు ఇంట్లోనే చికిత్స పొందుతోందని.. ఆమె ఆరోగ్యం నిలకడగా ఉందని అధికారులు వెల్లడించారు.

వుహాన్​లో మెడిసిన్​ మూడో సంవత్సరం చదువుకుంటున్న ఈ విద్యార్థిని.. గతేడాది జనవరిలో సెలవులకు భారత్​ వచ్చింది. అదే నెల 30న కరోనా పరీక్షలు నిర్వహించగా పాజిటివ్​ అని తేలింది. దీంతో ఆమె.. దేశంలో కరోనా సోకిన తొలి వ్యక్తి అయింది. త్రిస్సూర్ ఆస్పత్రిలో 3 వారాల చికిత్స అనంతరం ఆమె కోలుకుంది.

ఇదీ చదవండి : కేబినెట్​ కమిటీలలో కొత్త మంత్రులకు అవకాశం