'కొత్త' కరోనాను గుర్తించేందుకు 'జినోమిక్స్ కన్సార్టియం'

కరోనా వైరస్ జన్యు మార్పులను గుర్తించేందుకు జినోమిక్స్​ కన్సార్టియాన్ని ఏర్పాటు చేసింది కేంద్రం. దేశంలోని అన్ని ప్రాంతాల్లో వైరస్ మార్పులను తరచూ పర్యవేక్షించేందుకు ఈ నిర్ణయం తీసుకుంది. బ్రిటన్​లో కరోనా కొత్త రకం స్ట్రెయిన్ వ్యాప్తి చెందుతున్న నేపథ్యంలో వైరస్​ జన్యు క్రమాలు కనుగొనేందుకు ఈ మేరకు చర్యలు చేపట్టింది.

బ్రిటన్​లో అత్యంత ప్రమాదకరమైన కొత్త రకం కరోనా స్ట్రెయిన్​ విజృంభిస్తున్న నేపథ్యంలో కేంద్రం అప్రమత్తమైంది. కరోనా వైరస్​ జన్యుమార్పులను గుర్తించేందుకు 'ఇండియన్​ సార్స్​-కోవ్​-2 జినోమిక్స్​ కన్సార్టియం(ఐఎన్​ఎస్​ఏకసఓజీ)'ను ఏర్పాటు చేసింది. దేశంలోని బహుళ ప్రయోగశాలల నెట్​వర్క్​ ద్వారా వైరస్​ జన్యు రకాలను తరచూ పర్యవేక్షించేందుకు ఈ నిర్ణయం తీసుకుంది.

జీనోమ్ సీక్వెన్సింగ్ (ఆర్‌జిఎస్‌ఎల్) కోసం దేశంలో 10 ప్రాంతీయ హబ్ ప్రయోగశాలలు గుర్తించాలని కేంద్రం ప్రతిపాదించింది. ప్రయోగశాలల సంబంధిత రాష్ట్రాల్లో నమూనాల సేకరణ, రవాణాను స్పష్టంగా నిర్వచించేందుకు దేశాన్ని ఆరు ప్రాంతాలుగా విభజించనుంది.

తూర్పు, ఈశాన్య ప్రాంతాల్లో రెండు ప్రాంతీయ హబ్​లను ఏర్పాటు చేయనున్నారు. పశ్చిమ్​ బంగా, బిహార్, ఝార్ఖండ్, అసోం, త్రిపుర, మేఘాలయ, మణిపుర్, అరుణాచల్ ప్రదేశ్​, సిక్కిం, నాగలాండ్, మిజోరం, ఒడిశా, ఛత్తీస్​గఢ్​ రాష్ట్రాల అవసరాలను ఇవి తీర్చనున్నాయి.

దక్షిణాదిలో నాలుగు ప్రాంతీయ హబ్​లను ఏర్పాటు చేయనున్నారు. వీటి ద్వారా ఆంధ్రప్రదేశ్​, తెలంగాణ, గోవా, ఉత్తర కర్ణాటక, కర్ణాటక, తమిళనాడు, పుదుచ్చేరి రాష్ట్రాల కోసం వీటిని వినియోగించుకోనున్నారు.

రాజస్థాన్​, హరియాణా, పశ్చిమ యూపీ రాష్టాల కోసం మధ్య భారత్​లో ఒక ప్రాంతీయ హబ్​ ఏర్పాటు చేస్తారు. కేరళ, తూర్పు మధ్యప్రదేశ్​, ఉత్తరాఖండ్​, దిల్లీ, హరియాణా, హిమాచల్​ ప్రదేశ్​, లద్దాఖ్​, జమ్ముకశ్మీర్​, పంజాబ్​ రాష్ట్రాల కోసం మరో ప్రాంతీయ హబ్​ను నెలకొల్పుతారు.

నోడల్ యూనిట్

ఈ హబ్​ల నిర్వహణ కోసం దిల్లీలోని ఎన్​సీడీసీలో నోడల్ యూనిట్​ను సృష్టిస్తారు. బయోటెక్నాలజీ, ఎపిడెమియాలజీ, కేంద్ర నిఘా యూనిట్​ విభాగాల నుంచి అధికారులను ఎంపిక చేస్తారు. ఆయా రాష్ట్రాలు, జిల్లాల నుంచి నమునాల సేకరణ, సరఫరాకు నిఘా విభాగాలతో సమన్వయం కోసం నోడల్​ యూనిట్ సహకరిస్తుందని కేంద్రం ప్రకటనలో తెలిపింది.

వీటి ఏర్పాటు తర్వాత దేశంలో కరోనా జన్యుమార్పులు తరచూ పర్యవేక్షించవచ్చని కేంద్రం తెలపింది. భవిష్యత్తులో సమర్థవంతమైన వ్యాక్సిన్ అభివృద్ధి చేసేందుకు రీసెర్చ్ కన్సార్టియం సహకారం అందిస్తుందని పేర్కొంది.

ఈ ప్రాంతీయ హబ్​ల ప్రయోగశాలల్లో బ్రిటన్​​ కరోనా కొత్త స్ట్రెయిన్​ గానీ, వైరస్​లో మరే ఇతర జన్యుమార్పును గుర్తించినట్లయితే ఆ నమూనాను ఆర్సీబీ ఫరీదాబాద్​కు గానీ, లేక పుణెలోని ఎన్​ఐవీకి గానీ పంపి ప్రత్యేకంగా భద్రతపరచనున్నట్లు కేంద్రం వివరించింది. దానికి సంబంధించిన సమాచారాన్ని మార్గదర్శకాలకు అనుగుణంగా పంచుకుంటామని, ఫలితంగా చికిత్స, టీకా అభివృద్ధికి ఈ సమాచారం ఉపయోగపడుతుందని తెలిపింది.