తమిళనాడులోని ఓ పురాతన ఆలయ పునరుద్ధరణ పనులు చేపడుతుండగా.. భారీగా బంగారం బయటపడింది. ఈ సంఘటన కాంచీపురం జిల్లా ఉత్తీరమీరుర్లో జరిగింది.
గ్రామంలో రెండో కులోతుంగ చోళ కాలానికి చెందిన ఓ పురాతన కులంబేశ్వర ఆలయం ఉంది. దేవాలయ ఉత్సవ కమిటీ ఈ ఆలయాన్ని పునరుద్ధరించాలని నిర్ణయించింది. ఇందుకోసం.. దేవాలయ ప్రవేశ ద్వారం వద్ద ఉన్న నల్లరాతి మెట్లను తొలగింపు పనులు చేపట్టింది. పనులు జరుగుతుండగా.. వారికి వస్త్రంతో చుట్టిన ఓ మూట కనిపించింది. ఆ మూటను విప్పి చూస్తే.. బంగారు ఆభరణాలు లభ్యమయ్యాయి.
అయితే.. తమ అనుమతి లేకుండా 500 ఏళ్లనాటి ఆలయ భాగాల్ని పడగొట్టారనే విషయం తెలుసుకున్న రెవెన్యూ అధికారులు.. గ్రామానికి చేరుకున్నారు. బంగారాన్ని స్వాధీనం చేసుకున్నారు. ఈ నేపథ్యంలో అధికారులతో గ్రామస్థులు వాగ్వాదానికి దిగారు.
800 గ్రాముల పసిడిని తాము స్వాధీనం చేసుకున్నామని అధికారులు తెలిపారు. తాము చేరుకోకముందే.. బంగారాన్ని స్థానికులు తమ ఇళ్లకు తీసుకువెళ్లారని చెప్పారు.
ఈ బంగారు ఆభరణాలు.. 16 వ శతాబ్దంలో పాలించిన నాయకుల కాలానికి చెందినవిగా తెలుస్తోంది. దుండగుల భయంతో దేవుని విగ్రహానికి అలంకరించిన ఈ నగలను భూమిలో పాతి పెట్టి ఉంటారని భావిస్తున్నారు.
ఇదీ చూడండి:ఇక్కడ టీ తాగితే కప్ తినాల్సిందే..!
