Gurpatwant Singh Pannun Threat : పంజాబ్ ముఖ్యమంత్రి భగవంత్ మాన్ను హత్య చేస్తామని నిషేధిత సిక్స్ ఫర్ జస్టిస్(ఎస్ఎఫ్జే) సంస్థ అధినేత, ఖలిస్థానీ ఉగ్రవాది గురుపత్వంత్ సింగ్ పన్నూ హెచ్చరించాడు. రిపబ్లిక్ డే రోజునే సీఎంను చంపేస్తానని పేర్కొంటూ వీడియో విడుదల చేశాడు. ఆత్మాహుతి దాడిలో చనిపోయిన పంజాబ్ మాజీ సీఎం బేఅంత్ సింగ్తో మాన్ను పోల్చాడు పన్నూ. భగవంత్ మాన్ ఎక్కడి నుంచి త్రివర్ణ పతాకం ఎగిరేస్తే అక్కడ దాడి జరుపుతామని వ్యాఖ్యానించాడు. ఇందుకోసం పంజాబ్లోని గ్యాంగ్స్టర్లు తనను సంప్రదించాలని కోరాడు.
డీజీపీకి సైతం హెచ్చరిక
రాష్ట్రంలో శాంతి భద్రతలను మెరుగుపర్చేందుకు పోలీసులు తీసుకుంటున్న చర్యలను తప్పుబట్టాడు పన్నూ. పంజాబ్ డీజీపీ గౌరవ్ యాదవ్కు సైతం హెచ్చరికలు పంపాడు. ఇటీవల అనేక మంది గ్యాంగ్స్టర్లను పంజాబ్ పోలీసులు ఎన్కౌంటర్లో మట్టుబెట్టిన నేపథ్యంలో పన్నూ ఈ మేరకు హెచ్చరికలు చేశారు.
"పంజాబ్ పోలీసులు యువతకు వ్యతిరేకంగా నేరాలకు పాల్పడుతున్నారు. యువతను ఎన్కౌంటర్ చేస్తున్నారు. వారిని గ్యాంగ్స్టర్లుగా పేర్కొంటూ జైళ్లలో వేస్తున్నారు. నేటి బేఅంత్ సింగ్ అయిన భగవంత్ మాన్ యువతను తప్పుదోవ పట్టిస్తున్నారు. రిపబ్లిక్ డే రోజున పరిణామాలు మారిపోతాయి."
-గురుపత్వంత్ సింగ్ పన్నూ, సిక్స్ ఫర్ జస్టిస్ అధినేత
సిక్స్ ఫర్ జస్టిస్ను 2017లో స్థాపించారు. దాని వ్యవస్థాపక సభ్యుల్లో గురుపత్వంత్ సింగ్ పన్నూ కూడా ఒకడు. ఈ సంస్థను భారత్ 2019లో నిషేధించింది. చట్ట వ్యతిరేక కార్యకలాపాల కింద (యూఏపీఏ) గురుపత్వంత్ను భారత ప్రభుత్వం 2020లో ఉగ్రవాదిగా ప్రకటించింది. దేశంలోని వివిధ ప్రాంతాలపై దాడులు చేస్తామంటూ ఇటీవల తరచుగా బెదిరింపులకు దిగుతున్నాడు గురుపత్వంత్ పన్నూ. వీటిని కేంద్ర ప్రభుత్వం తీవ్రంగా పరిగణిస్తోంది. కీలక ప్రదేశాల్లో ఎప్పటికప్పుడు భద్రతను కట్టుదిట్టం చేస్తోంది.
పార్లమెంట్పై దాడి చేస్తానని గతేడాది డిసెంబర్ 6న హెచ్చరికలు చేశాడు పన్నూ. 2001లో పార్లమెంట్పై దాడి జరిగిన డిసెంబర్ 13న లేదా అంతకుముందే ఈ దాడి జరుగుతుందంటూ హెచ్చరించాడు. దిల్లీని ఖలిస్థానీగా మారుస్తామంటూ పేర్కొన్నాడు. ఈ నేపథ్యంలో అప్రమత్తమైన కేంద్ర నిఘా సంస్థలు, ఏజెన్సీలు భద్రతను కట్టుదిట్టం చేశాయి.
