దిల్లీలో ప్రజలు ఎన్నుకున్న ప్రభుత్వంతో సమానమైన అధికారాలు లెఫ్టినెంట్ గవర్నర్‌కు ఉండేలా తీసుకొచ్చిన "ది గవర్నమెంట్ ఆఫ్ నేషనల్ క్యాపిటల్ టెరిటరీ ఆఫ్ దిల్లీ సవరణ చట్టం- 2021"ను నోటిఫై చేసినట్లు కేంద్రం తెలిపింది. ఈ మేరకు.. మంగళవారం నాడు నోటిఫికేషన్ జారీ చేసినట్లు పేర్కొంది. ఇకపై దిల్లీ సర్కారు ఏ నిర్ణయం తీసుకోవాల్సి వచ్చినా లెఫ్టినెంట్ అభిప్రాయాన్ని పరిగణనలోకి తీసుకోవడం తప్పనిసరి కానుంది.
ఈ చట్టం గత పార్లమెంటు సమావేశాల్లో విపక్షాల ఆందోళనల మధ్యే ఉభయసభల్లో ఆమోదం పొందింది. ఆ బిల్లు పార్లమెంటు ఆమోదం పొందిన సమయంలో.. భారత ప్రజాస్వామ్యానికి ఓ విషాదకరమైన రోజుగా పేర్కొన్న దిల్లీ ముఖ్యమంత్రి అరవింద్ కేజ్రీవాల్‌ ఇప్పుడు కేంద్రం జారీ చేసిన నోటిఫికేషన్ దిల్లీ ప్రజలకు అవమానకరమైనదిగా పేర్కొన్నారు.
2018లో దిల్లీ సర్కార్‌- లెఫ్టినెంట్ గవర్నర్ వివాదంపై స్పందించిన సుప్రీం.. దిల్లీ ప్రభుత్వ కేబినెట్ తీసుకునే నిర్ణయాలన్నీ లెఫ్టినెంట్ గవర్నర్‌కు తెలియచేయాల్సి ఉంటుందని, ఐతే లెఫ్టినెంట్ గవర్నర్ ఏకాభిప్రాయం మాత్రం అవసరం ఉండబోదని తేల్చి చెప్పింది. పోలీస్‌, పబ్లిక్‌ ఆర్డర్‌, భూములకు సంబంధించిన విషయాల్లో మాత్రం ఎల్‌జీ అభిప్రాయాలు తీసుకోవాలని పేర్కొంది. అంతేకానీ ఎల్‌జీ స్వతహాగా నిర్ణయాలు తీసుకోజాలరని తేల్చి చెప్పింది. ఈ తరుణంలో చట్టానికి సవరణలు చేసిన కేంద్రం.. ఎల్‌జీకి కూడా సమాన అధికారాలు కట్టబెడుతూ నోటిఫికేషన్ ఇచ్చింది.
ఇదీ చదవండి:ఆ జంట.. ఫస్ట్ నైట్కు బ్రేకిచ్చిన కరోనా
