Road Accident: మహారాష్ట్రలోని వషీమ్ జిల్లాలో ఘోర రోడ్డు ప్రమాదం జరిగింది. వ్యాన్-ట్రాక్టర్ ఢీకొన్న ఘటనలో నలుగురు ప్రాణాలు కోల్పోయారు. మరో తొమ్మిది మంది తీవ్రంగా గాయపడ్డారు. ఈ దుర్ఘటన మంగళవారం రాత్రి 8 గంటల సమయంలో జరిగింది.
నాగ్పుర్లోని బంధువుల వివాహానికి హాజరై అక్కడి నుంచి తిరిగి వస్తుండగా ఈ విషాదం జరిగిందని అధికారులు వెల్లడించారు. మృతులు ప్రయాణిస్తున్న వ్యాన్ అదుపు తప్పి ఆగి ఉన్న ట్రాక్టర్ను ఢీకొనడం వల్ల ఈ దుర్ఘటన జరిగినట్లు తెలిపారు. ఈ క్రమంలో నలుగురు మృతిచెందగా తొమ్మిది మంది తీవ్రంగా గాయపడ్డారని.. క్షతగాత్రులను స్థానిక ఆసుపత్రికి తరలించినట్లు వెల్లడించారు. బాధితులు అంతా సవాంగా జెహంగిర్ గ్రామానికి చెందిన వారిగా అధికారులు గుర్తించారు.
ప్రాణం తీసిన సెల్ఫీ..
రైలు పట్టాలపై సెల్ఫీ దిగేందుకు ప్రయత్నించిన నలుగురు యువకులు దుర్మరణం పాలయ్యారు. దిల్లీ శివార్లలోని గురుగ్రామ్ రైల్వే స్టేషన్ పరిధిలో మంగళవారం సాయంత్రం సుమారు 5 గంటలకు ఈ ఘటన జరిగింది. రైలు వస్తున్నా కదలకుండా పట్టాలపై నిల్చుని సెల్ఫీలు దిగేందుకు యువకులు ప్రయత్నించారని.. ఈ క్రమంలోనే రైలు వారిపై నుంచి దూసుకెళ్లిందని తెలిపారు. వీరు.. దేవీలాల్ కాలనీకి చెందిన సమీర్ (19), మహమ్మద్ అనస్ (20), యూసఫ్ అలియాస్ భోలా (21), యువరాజ్ గోగియా (18)గా అదికారులు గుర్తించారు.
ఇదీ చూడండి : జైలు నుంచి విడుదలైన కేంద్రమంత్రి తనయుడు ఆశిష్‌ మిశ్రా
