ఉత్తరాఖండ్ కార్చిచ్చును అదుపు చేసేందుకు కేంద్రం చర్యలను ముమ్మరం చేసింది. వాయుసేనకు చెందిన హెలికాప్టర్ల సాయంతో అధికారులు ప్రస్తుతం తెహ్రీ గర్హవాల్ సమీపంలోని అటవీ ప్రాంతంలో మంటలను ఆర్పేందుకు ప్రయత్నిస్తున్నారు. ఇందుకోసం స్థానిక తెహ్రీ సరస్సు నుంచి 5వేల లీటర్ల సామర్థ్యం ఉన్న భారీ బకెట్తో నీటిని సేకరించి మంటలు చెలరేగుతున్న ప్రాంతంలో చల్లుతున్నారు.
అగ్నిమాపక చర్యల్లో రాష్ట్ర ప్రభుత్వానికి సాయం అందిచేందుకు కేంద్రం ఆదివారం రెండు హెలికాప్టర్లను పంపించింది.
రాష్ట్రంలోని నైనితాల్, అల్మోరా, తెహ్రీ, పౌరీ జిల్లాల్లోని అటవీ ప్రాంతంలో శనివారం కార్చిచ్చు చెలరేగింది. మంటల ధాటికి నలుగురు ప్రాణాలు కోల్పోయారు. గర్హవాల్, కుమాన్ ప్రాంతాల్లో 40 చోట్ల మంటలు ఇంకా అదుపులోకి రావాల్సి ఉంది. ఇందుకోసం రాష్ట్ర ప్రభుత్వం ఇప్పటికే 12వేల మంది అటవీ శాఖ సిబ్బంది, 13వేల ఫైర్ స్టేషన్లను రంగంలోకి దింపింది.
ఇటీవల కాలంలో తక్కువ వర్షపాతం నమోదు కావడమే కార్చిచ్చు చెలరేగడానికి కారణమై ఉంటుందని అధికారులు భావిస్తున్నారు. ఈ ఏడాది జనవరి నుంచి ఇప్పటివరకు కార్చిచ్చుకు సంబంధించి మొత్తం 983 ఘటనలు జరిగాయని, 1,292 హెక్టార్ల అడవి దగ్ధమైందని వెల్లడించారు.
ఇదీ చదవండి : 'మహా' మంత్రి అనిల్పై సీబీఐ దర్యాప్తు!
