'టీకాల విషయంలో దేశీయ అవసరాలే తొలి ప్రాధాన్యం'

విదేశాలకు కేంద్రం టీకా ఎగుమతి చేయడం డోసుల అందుబాటుపైన ఆధారపడి ఉంటుందని పేర్కొన్నారు విదేశాంగ ప్రతినిధి అరిందం బాగ్చి. దేశంలో టీకా పంపిణీపైనే ప్రభుత్వం దృష్టి సారిస్తోందని తెలిపారు.

కొవిడ్​ టీకాల(Covid Vaccine) విషయంలో దేశీయ పంపిణీనే తొలి ప్రాధాన్యమని, విదేశాలకు ఎగుమతి డోసుల అందుబాటుపై ఆధారపడి ఉంటుందన్నారు విదేశాంగ ప్రతినిధి అరిందం బాగ్చి. దేశంలో తయారైన టీకాలను స్థానికంగా వినియోగించుకునేందుకే కేంద్రం మొగ్గు చూపుతోందని తెలిపారు. డోసుల ఉత్పత్తి పెంచేందుకు ప్రభుత్వం కృషి చేస్తోందని వెల్లడించారు. భారత్​ నుంచి బంగ్లాదేశ్​కు టీకా ఎగుమతికి సంబంధించి వస్తున్న వార్తలపై గురువారం ఈ విధంగా స్పందించారు.

ఫైజర్(Pfizer)​ వ్యాక్సిన్​ను భారత్​లో అందుబాటులోకి తెచ్చేందుకు కేంద్రం అన్ని విధాలా కృషి చేస్తోందని పేర్కొన్నారు బాగ్చి. భారత్​ బయోటెక్(Bharat Biotech)​ సంస్థ రూపొందించిన కొవాగ్జిన్(Covaxin)​కు విదేశాల్లో అత్యవసర వినియోగానికి డబ్ల్యూహెచ్​ఓ నుంచి అనుమతికి సంబంధించి కూడా ప్రభుత్వం పర్యవేక్షిస్తోందన్నారు.

కొవాక్స్​పై టీకాల కొరత ప్రభావం..

టీకాల కొరత నేపథ్యంలో కొవాక్స్​ కార్యక్రమం నిర్వహిస్తున్న గావీ సంస్థ కీలక ప్రకటన చేసింది. ఈ ఏడాది చివరిలోగా 2 బిలియన్​ డోసులకుపైగా అందించాలన్న తమ లక్ష్యాన్ని 1.9 బిలియన్​ డోసులకు పరిమితం చేస్తున్నట్లు పేర్కొంది. భారత్​లో టీకాల పంపిణీకి సీరం సంస్థ ప్రాధాన్యం ఇవ్వడమే ఇందుకు కారణంగా తెలుస్తోంది. టీకాల సరఫరాకు సంబంధించి కొవాక్స్​ కార్యక్రమ నిర్వాహకులకు సీరం సంస్థే అధిక శాతం డోసులను అందిస్తోంది.

ఇదీ చదవండి : Vaccine for children: చిన్న పిల్లలకు టీకా ఎప్పుడు? ఎలా?