ఛత్తీస్గఢ్ బీజాపుర్ ఎన్కౌంటర్లో గల్లంతైన కోబ్రా కమాండోను గుర్తించేందుకు అన్ని విధాలుగా ప్రయత్నిస్తున్నట్టు ఓ సీనియర్ అధికారి వెల్లడించారు. ఆ జవాను గురించి సమాచారం సేకరించేలా పోలీస్ ఇన్ఫార్మర్లను అప్రమత్తం చేసినట్టు పేర్కొన్నారు. స్థానిక గ్రామాల్లోని ప్రజల నుంచి కూడా వివరాలు సేకరిస్తున్నట్టు స్పష్టం చేశారు.
బీజాపుర్ ప్రాంతంలో శనివారం నక్సలైట్లు-సీఆర్పీఎఫ్ జవాన్ల మధ్య భీకర ఎదురుకాల్పులు జరిగాయి. ఈ ఘటనలో 22మంది సైనికులు అమరులయ్యారు. మరో 31మంది గాయపడ్డారు. అయితే ఎన్కౌంటర్ అనంతరం.. 210 కోబ్రా బెటాలియన్కు చెందిన కానిస్టేబుల్ రాకేశ్వర్ సింగ్ మిన్హాస్ గల్లంతయ్యారు. సైనికుడిని మావోయిస్టులు అపహరించినట్టు తనకు ఫోన్ వచ్చిందని ఓ జర్నలిస్ట్ వెల్లడించారు.
"గల్లంతైన జవాను మావోయిస్టుల వద్దే ఉన్నాడని ఇప్పుడే స్పష్టంగా చెప్పలేము. మావోయిస్టులు.. ఇందుకు సంబంధించిన ఫొటోలు, ప్రకటనలు ఏవీ చేయలేదు. కానీ ఆ జవానును గుర్తించేందుకు అన్ని విధాలుగా ప్రయత్నిస్తున్నాము."
--- పీ సుందర్ రాజ్, బస్తర్ ఐజీ.
అయితే గల్లంతైన జవాను.. నక్సలైట్ల వద్ద ఉండే అవకాశాలే ఎక్కువని మరో సీనియర్ అధికారి అభిప్రాయపడ్డారు. ఎన్కౌంటర్ ప్రాంతంలో రెండు రోజులు నిర్బంధ తనిఖీలు నిర్వహించినా.. జవాను ఆచూకీ తెలియకపోవడమే ఇందుకు కారణమన్నారు.
ఇదీ చూడండి:- నక్సల్స్ ఎత్తుగడలు తెలిసీ- చిక్కుకుంటున్న బలగాలు
