కరోనా రెండో దశ తగ్గుముఖం పడుతుందనుకుంటున్న క్రమంలో.. డెల్టా ప్లస్ వేరియంట్ ఆందోళన కలిగిస్తోంది. డెల్టా వేరియంట్లో సంభవించిన మ్యుటేషన్ కారణంగా పుట్టుకొచ్చిన ఈ తరహా కేసులు దేశంలో పెరిగిపోతున్నాయి.
ఇప్పటివరకు ఎన్ని కేసులు..
- మహారాష్ట్రలో అత్యధికంగా 21 మంది ఈ వైరస్ బారినపడ్డారు. రాష్ట్రంలో కేసులు తగ్గుతున్న కారణంగా.. లాక్డౌన్ సడలింపులతో పర్యటకుల సంఖ్య పెరిగింది. ఈ నేపథ్యంలోనే డెల్టా ప్లస్ కేసులు పెరగడం అక్కడి ప్రజల్లో మళ్లీ భయాల్ని పెంచుతున్నాయి.
- కేరళ, మధ్యప్రదేశ్లోనూ ఈ తరహా వేరియంట్ కేసులు వెలుగుచూస్తున్నాయి. మధ్యప్రదేశ్లో ఐదుగురు దీని బారినపడగా.. ఒకరు చనిపోయారు. మిగతా నలుగురూ.. టీకా తీసుకున్నవాళ్లేనని, వారి ఆరోగ్య పరిస్థితి నిలకడగా ఉందని అధికారులు తెలిపారు.
- కర్ణాటకలో డెల్టా ప్లస్ కేసుల సంఖ్య రెండుకు చేరింది. జూన్ 22న మైసూర్లో తొలి కేసు వెలుగుచూడగా.. మరుసటి రోజు బెంగళూరులోనూ ఒకరికి ఈ వైరస్ సోకిందని రాష్ట్ర ఆరోగ్య శాఖ మంత్రి కె. సుధాకర్ వెల్లడించారు.
- జమ్ముకశ్మీర్ కత్రా ప్రాంతంలోనూ డెల్టా ప్లస్ వేరియంట్ కేసు వెలుగుచూసిందని అధికారులు తెలిపారు.
తీవ్రమైనదా?
డెల్టా ప్లస్ వేరియంట్ను ఆందోళనకరమైనదిగా పరిగణించాలని (వేరియంట్ ఆఫ్ కన్సర్న్-వీఓసీ) కేంద్రం మంగళవారమే ప్రకటించింది. చాలా మందిపై ఇది తీవ్ర ప్రభావం చూపించే అవకాశం ఉందని పేర్కొంది.
ఈ డెల్టా ప్లస్ వేరియంట్ గురించి కీలక విషయాలు వెల్లడించారు సీనియర్ ప్రజారోగ్య నిపుణురాలు, ఇండియన్ అసోసియేషన్ ఆఫ్ ప్రివెంటివ్ అండ్ సోషల్ మెడిసిన్(ఐఏపీఎస్ఎం) అధ్యక్షురాలు డా. సునీలా గార్గ్.
వేగంగా వ్యాప్తి?
డెల్టా ప్లస్ వేరియంట్ వ్యాప్తి ఎక్కువగా ఉందని, యాంటీబాడీలను తగ్గిస్తుందని చెప్పారు గార్గ్. టీకా తయారీదారులు.. యాంటీబాడీ బూస్టర్ను ప్రోత్సహించడంతో పాటు వేరియంట్లకు అనుగుణంగా.. వ్యాక్సిన్లలో మార్పులు చేస్తుండాలని సూచించారు.
టీకా పనిచేయదా?
మనం టీకా తీసుకున్నప్పటికీ ఈ వైరస్ సోకే అవకాశాలున్నాయని పేర్కొన్నారు డా. సునీలా. మనలో యాంటీబాడీలు ఉన్నా, వ్యాక్సిన్ తీసుకున్నా.. వైరస్కేం అడ్డురాదని వివరించారు.
ఇప్పుడున్న వ్యాక్సిన్లు సరిపోవా?
డెల్టా ప్లస్ వేరియంట్ జన్యుశ్రేణిని వీలైనంత త్వరగా గుర్తించి.. దానికి తగ్గట్లు వ్యాక్సిన్లను అప్డేట్ చేయాలని సూచించారు గార్గ్. అయితే ప్రస్తుతం మనదేశంలో ఉన్న వ్యాక్సిన్లు డెల్టా వేరియంట్పై మాత్రం బాగానే పనిచేస్తున్నాయని అన్నారు.
''మనకు కొవాగ్జిన్, కొవిషీల్డ్, స్పుత్నిక్.. 3 వ్యాక్సిన్లు ఉన్నాయి. ఆస్ట్రాజెనెకా(కొవిషీల్డ్) టీకా డెల్టా వేరియంట్పై 60 శాతం సమర్థంగా పనిచేస్తోంది. ఫైజర్ మాత్రం 88 శాతం మెరుగ్గా పనిచేస్తోంది.''
- సునీలా గార్గ్
బూస్టర్ డోసు అవసరమా?
కొత్త కొత్త వేరియంట్లు వెలుగుచూస్తున్న నేపథ్యంలో.. టీకా తయారీదారులు సందిగ్ధంలో పడ్డారని గార్గ్ పేర్కొన్నారు. ఇప్పుడు బూస్టర్ డోసు అవసరమా? టీకాలను సవరించాలా? అని ఆలోచిస్తున్నట్లు తెలిపారు.
డెల్టానా బీటానా..?
డెల్టా ప్లస్ వేరియంట్ లక్షణాలు.. డెల్టానే పోలినప్పటికీ, ఈ రకం మ్యుటేషన్ సౌతాఫ్రికాలో బీటా వేరియంట్లో వెలుగు చూసిందని, అది టీకాను తప్పించుకొన్నట్లు గుర్తుచేశారు గార్గ్.
అప్పట్లో సౌతాఫ్రికాలో వెలుగుచూసిన వేరియంట్లపై వ్యాక్సిన్ పనిచేయట్లేదని.. ఆస్ట్రాజెనెకా టీకాను వెనక్కిపంపింది అక్కడి ప్రభుత్వం.
ఏం చేయాలి..?
బ్రిటన్, అమెరికా సహా 9దేశాల్లో ఈ వేరియంట్ కేసులు ఎక్కువగా వెలుగుచూస్తున్నాయని, భారత్లో ఇప్పుడు ప్రాథమిక దశలోనే ఉందని చెప్పారు గార్గ్.
''డెల్టా ప్లస్ వేరియంట్ గురించి ప్రజలు అంతా అత్యంత జాగ్రత్తగా ఉండాలి. కరోనా సెకండ్ వేవ్లో డెల్టా వేరియంట్ ప్రజలపై ఎలాంటి ప్రభావం చూపిందో మీకు తెలుసు కదా.''
- డా. సునీలా గార్గ్.
జాగ్రత్త..
డెల్టా ప్లస్ కారణంగా.. ఇప్పుడు కచ్చితంగా భౌతిక దూరం పాటించాల్సిందేనని, ప్రజలు అత్యంత జాగ్రత్తగా ఉండాలని ఆమె వివరించారు.
డెల్టా ప్లస్ వేరియంట్ విస్తరిస్తున్న నేపథ్యంలో.. ఆయా రాష్ట్రాలకు కేంద్ర ఆరోగ్య మంత్రిత్వ శాఖ పలు సూచనలు చేసింది. ప్రజారోగ్య వ్యవస్థను బలోపేతం చేయాలని, టెస్టింగ్, ట్రాకింగ్, వ్యాక్సినేషన్ వేగం పెంచాలని స్పష్టం చేసింది.
ఇవీ చదవండి: Vaccine for children: చిన్న పిల్లలకు టీకా ఎప్పుడు? ఎలా?
'టీకా వేసుకోకపోతే భారత్కు వెళ్లండి.. లేకపోతే పందుల ఇంజక్షన్'
