Enforcement Directorate arrests NCP leader: ముంబయి అండర్వరల్డ్ వ్యవహారాలకు సంబంధించిన మనీలాండరింగ్ కేసులో మహారాష్ట్ర మంత్రి నవాబ్ మాలిక్ను ఎన్ఫోర్స్మెంట్ డైరెక్టరేట్ అరెస్ట్ చేసింది. అంతకుముందు అక్రమ నగదు లావాదేవీల నిరోధక చట్టం కింద నవాబ్ మాలిక్ వాంగ్మూలాన్ని నమోదుచేసినట్లు ఈడీ అధికారులు వెల్లడించారు. ఆయనను ఆరు గంటలపాటు ప్రశ్నించిన అనంతరం అరెస్టుపై ప్రకటన చేశారు. విచారణకు నవాబ్ మాలిక్ సహకరించటం లేదని.. అందుకే అరెస్ట్ చేసినట్లు ఈడీ అధికారులు తెలిపారు. ముంబయి పీఎంఎల్ఏ కోర్టులో హాజరుపరిచి.. ఈడీ కస్టడీకి అనుమతి కోరగా మార్చి 3 వరకు కస్టడీ విధించింది.
కస్టడీ సమయంలో తన మెడిసిన్స్ తీసుకెళ్లేందుకు.. ఇంటి భోజనం తెప్పించుకునేందుకు నవాబ్ మాలిక్కు కోర్టు అనుమతించింది.
భయపడేది లేదు..
"అరెస్ట్ చేశారు.. అయినా భయపడేది లేదు. పోరాడి విజయం సాధిస్తాం" అని అన్నారు మాలిక్. అరెస్ట్ అనంతరం వైద్య పరీక్షల కోసం తరలిస్తున్న క్రమంలో ఈ వ్యాఖ్యలు చేశారు.
ఎన్సీపీ కార్యకర్తల ఆందోళన..
నవాబ్ మాలిక్ను అరెస్ట్ నేపథ్యంలో ముంబయిలోని ఈడీ కార్యాలయానికి భారీ తరలివచ్చారు ఎన్సీపీ కార్యకర్తలు. అరెస్ట్కు వ్యతిరేకంగా నినాదాలతో హోరెత్తించారు.
తెల్లవారు జామున 4 గంటలకే..
బుధవారం తెల్లవారుజామున 4 గంటలకు ముంబయిలోని ఈడీ కార్యాలయానికి చేరుకున్నారు మాలిక్. ఉదయం 7 గంటలకు విచారణ చేపట్టారు. అండర్వరల్డ్ డాన్ దావూద్ అక్రమ ఆస్తులు, కొద్ది రోజుల క్రితం అరెస్టయిన దావూద్ సోదరుడు ఇబ్రహిం కస్కర్తో సహా పలు అనుమానిత నిందితులతో సంబంధాలపై ప్రశ్నించినట్లు ఈడీ వర్గాలు పేర్కొన్నాయి. దావూద్, అతని అనుచరుల కోసం పలు చోట్ల వివాదాస్పద ఆస్తులను నవాబ్ మాలిక్ కొనుగోలు చేసినట్లు ఇటీవల ఆరోపణలు వచ్చాయి. దీంతో దావూద్కు సంబంధించిన ప్రతి చిన్న అంశాన్ని నిశితంగా పరిశీలిస్తోంది ఈడీ. ఇబ్రహిం కస్కర్ను అరెస్ట్ చేసిన తర్వాత.. విచారణలో కీలక రహస్యాలను ఈడీకి వివరించినట్లు అధికారులు తెలిపారు. ఆ విషయాల ఆధారంగానే నవాబ్ మాలిక్కు నోటీసులు ఇచ్చి విచారణకు ఆదేశించినట్లు తెప్పారు.
ఈ కేసు దర్యాప్తులో భాగంగా కొంతకాలం క్రితం ముంబయి, పుణె సహా పలు ప్రదేశాల్లో దాడులు నిర్వహించింది ఈడీ. ముఖ్యమైన పత్రాలు స్వాధీనం చేసుకుంది. అందులో అక్రమ ఆస్తులకు సంబంధించిన పత్రాలు, అనుమానాస్పద బ్యాంకింగ్ లావాదేవీల పత్రాలు ఉన్నట్లు ఈడీ వర్గాలు తెలిపాయి. ఈ పత్రాలపైనే మాలిక్ను ప్రశ్నించినట్లు పేర్కొన్నారు. నవాబ్ మాలిక్ ఈడీ కార్యాలయానికి చేరుకున్న సమయం నుంచి ఆయన నివాసాన్ని తమ అధీనంలోకి తీసుకున్నట్లు చెప్పారు అధికారులు.
అధికార దుర్వినియోగమే: ఎన్సీపీ
మహారాష్ట్ర మంత్రి నవాబ్ మాలిక్ను ఈడీ అరెస్ట్ చేసిన క్రమంలో భాజపాపై విమర్శలు గుప్పించింది నేషనలిస్ట్ కాంగ్రెస్ పార్టీ. అధికార దుర్వినియోగానికి మరో ఉదాహరణగా పేర్కొంది. కొందరు చేసిన తప్పులను ఎత్తిచూపుతున్నందునే ఆయన గొంతును నొక్కేందుకు చేస్తున్న ప్రయత్నాలని ఆరోపించింది. ఆయన బహిరంగంగా మాట్లాడినందుకు ఇలాంటి చర్యలు ముందుగానే ఊహించామన్నారు ఎన్సీపీ అధినేత శరద్ పవార్. రాజకీయ ప్రత్యర్థులను కట్టడి చేయాలని వ్యూహాలపై కలిసికట్టుగా పోరాడాల్సిన అవసరం ఉందన్నారు.
ప్రతీకార రాజకీయంగా చూడొద్దు: భాజపా
ఎన్ఫోర్స్మెంట్ డైరెక్టరేట్ చర్యలను ప్రతీకార రాజకీయాలుగా అభివర్ణించొద్దని స్పష్టం చేసింది భాజపా రాష్ట్ర విభాగం. అధికార పార్టీ నేతలు అధికార దుర్వినియోగానికి పాల్పడినట్లు భావిస్తే.. కోర్టుకు వెళ్లాలని సూచించింది. ఈడీ అరెస్ట్ చేసిన క్రమంలో మాలిక్కు మంత్రివర్గంలో ఉండే హక్కులేదని, ఆయన రాజీనామా చేయాలని డిమాండ్ చేసింది.
